Версия для слабовидящих

Зарни сӥзьыл куазь

Название материала: Зарни сӥзьыл куазь

 

Содержание:

8-11-тӥ классъёслы крезьгуро гостиной

 

Целeз: Удмурт поэтъёслэн зарни сӥзьыл темалы сӥзем кылбуръёсынызы тодматоно; сӥзьыл куазьлэсь чеберлыксэ адӟытоно.

 

Адӟытон: удмурт поэтъёслэн кылбур сборникъёссы, сӥзьыл инкуазен суред.

 

Эпиграф:

Кема ужам анай кадь со йӧно,

Лыктэ со котьку тачак саламен,

Уг пот мӧзмыт дырзэ но курламе...

 

Усьтӥськом  литературно-музыкальной гостиноймес «ЗАРНИ СӤЗЬЫЛ КУАЗЬ».

 

1-тӥ нуись: Дорамы кузёяське сӥзьыл. Сӥзьыл - инкуазьлэн туж чебер, узыр, паймымон, кызьы шуо тросэз поэтъёс «зарни вакытэз». Зэм но, туэ куарусён но коньывуон толэзьёс шунытэсь, шулдыресь вал. Та вакытлэсь чеберлыксэ данъяса, вунонтэм чуръёс кылдытӥзы ӟуч литератураын А. Пушкин, С. Есенин,  Ф. Тютчев но мукетъёсыз. Удмурт литератураын, Пушкин сямен ик, сӥзьылэз яратӥзы Ф. Васильев, И. Гаврилов. Синмаськымон возьматыны быгатӥзы удмурт литератураысь классикъёс: С. Широбоков, Н. Байтеряков, М. Петров, А. Лужанин, Илья Зорин, М. Покчи-Петров но тросэз егит поэтъёс.

 

Тани нош ик вуиз сӥзьыл куазь,

Шӧдыны но сое чик ӧйлась.

Зарниен биниськиз возь, нюлэс,

Бусыысь октӥмы ю-няньмес.

Ф. Кедров.

 

1-тӥ нуись: Ӟырдыт ужъёсын пачылмем гужемлэсь кызьы ортчемзэ ик шӧдыны ӧйлась. Тани зарнияськизы ини шур кузя кыстӥськись арамаос, чебер адско ӵужектэм кызьпуос, горд весьёсынызы ворекъяло палэзьпуос.

Зарни сӥзьыл! Кин уг яраты таӵе шулдырез!

 

2-тӥ нуись: 70 ар талэсь азьло Ф. Кедров гожтӥз «Яратско сӥзьылэз» кылбурзэ. Автор возьматэ сӥзьыллэсь «зарниен биниськемзэ», лирической геройлэн мылкыд капчи, шӧдӥське солэн сӥзьылэз яратэмез.

 

Дышетскись вера Ф. Кедровлэсь «Яратско сӥзьылэз» кылбурзэ

 

1-тӥ нуись:

Кема ужам анай кадь со йӧно,

Лыктэ со котьку тачак саламен,

Уг пот мӧзмыт дырзэ но курламе...

Гожтэ А. Белоногов «Саламен лыктэ» кылбураз.

 

Дышетскись лыдӟе «Саламен лыктэ» кылбурез

 

2-тӥ нуись: Трос кылбуръёс сӥзьыл сярысь гожтӥз Ф. И. Васильев. Сӥзьылэз со аспӧртэм возьматэ сюан дыръя выль кенэн ӵошатэ, ӵыж-горд пиштӥсь кышетэн, чебер, яркыт дӥсен ветлэ ураметӥ. Сӥзьыллэсь кутсконзэ, зарни вакытэ, автор данъяськыса, капчи мылкыдын вера, нош бер сӥзьыл мӧзмыт сямо луэ,  лирической герой малпаськись, мӧзмыт мылкыдо, улон сярысь сюлмаськисен возьматэмын.

 

Дышетскисьёс лыдӟо «Зарни сӥзьыл», «Тодмалод», «Куар усён толэзь» кылбуръёсты.

 

1-тӥ нуись: Шулдыр ик та сӥзьыл нюлэсэд. Ӵужектэ тани кызьпуэд, гордэктэ палэзьпуэд. Кылбуръёсын но ӵем гинэ пумиськыло сирпулэн, кызьпулэн, палэзьпулэн образъёссы. Игнатий Гавриловлэн котькудӥз образэз син азе яркыт пуксе. Тани кылзэ кӧнязэ ке соос пӧлысь. Дышетскисьёс лыдӟо: «Палэзьпу», «Сӥзьыл ӵукна», «Корка вӧзысь сирпуме».

 

Корка вӧзысь сирпуме ӵукна гӧр басьтэм,

Азвесё чильтэръёсын мунё кадь воштэм.

Марӟан весьёс ошылэм, угы бырттылэм,

Сётэм инӟыё изьы, кузьмам на пӧзьы.

Сылэ ваё сирпуэ, яркыт пиштыса,

Льӧльырась шунды азьын горд-горд ӝуаса.

И. Гаврилов.

 

2-тӥ нуись: Сӥзьыл сярысь кылбур чуръёс кылдытӥз Л. Лужании но. Тужгес тодмоосыз «Кужым сётэ»,  «Бусъёсын шобырскизы». 80-тӥ аръёсы та кырӟанэз яратыса кырӟазы егитъёс но, мӧйыос но.  Кылбурын мӧзмон мылкыд кузёяське. Но со мӧзмон урод маке ӧвӧл, солэн но аслаз чеберез вань, шуэ кылбурчи. 

Мӧзмонэз тодытэк, валалод шат, мар со зэмос яратон. Али чузъяськоз та кырӟан.

 

9-тӥ классын дышетскись нылъёс кырӟало «Бусъёсын шобырскизы» кырӟанэз

 

Дышетскись лыдӟе «Кужым сётэ» кылбурез

 

1-тӥ нуись: «Зарни сӥзьыл», «Зарни арама» - тазьы нимам кылбуръёссэ С. П. Широбоков. Чуръёс озьы ик кырӟанэ курисько: сӥзьыл нюлэсэз солэн чиля, ӝуа, ворекъя тылын; пислэг но, шушы но, ӝакы но - чипсо, шулало, чиргето нюлэс тыр.

 

Дышетскись лыдӟе «Зарни арама» кылбурез.

 

Ветлӥд-а куке тон сӥзьыл нюлэсэ,

Адӟид-а отысь пужъятэм сюресэз?

Дуно ковёрлэсь но чылкыт со, чебер!

Я ӵуж со, я льӧль - басьтымтэ на пужмер -

Чиля но ӝуа, ворекъя кадь тылын,

Мусо крезьгурен ӵаштыртэ пыд улын.

 

Чузъяське кырӟан «Зарни сӥзьыл»

 

Дышетскись лыдӟе «Эх, тодысал ке тон, сӥзьыл!» кылбурез

 

1-тӥ  нуись:

Нош ик кошко туриос,

Мӧзмыт гурзэс гурласа.

Нош ик ортчиз гужемед,

Вож кышетэн шонаса.

 

Коньывуонлэн берпуметӥ нуналъёсыз. Инкуазьлэн вунонтэм зарни тусбуйыз быриз. Мылкыд но кыӵе ке мӧзмылэс луэ. Ма ӵок бен, вуоз ук нош ик тулыс, выльысь улӟоз инкуазь.

 

Дышетскисьёс лыдӟо:

 

Н. Байтеряков «Малы яратӥсько?»

И. Зорин «Туриос лобӟо»

А. Вотяков «Бер сӥзьыл»

 

Ужрад йылпумъяське «Сӥзьыл вальс» кырӟанэн. Арган шудэмъя кырӟало 9-тӥ классын дышетскисьёс.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru