Версия для слабовидящих

Гурт калыклэсь сямъёссэ чакласа: кырӟан улонын уг люкеты

Название материала: Гурт калыклэсь сямъёссэ чакласа: кырӟан улонын уг люкеты

 

Содержание:

Та ужрадэз ортчытыны луоз шоро-куспо классын дышетскисьёсын, егитъёсын

 

Целез:

1) Гуртысь калыкез гажан пыӵатон;

2) Вордскем гуртэныд данъяськон сям пыӵатон;

3) Гурт калыклэсь сямъёссэ, йылолъёссэ чаклан;

 

Ужрадэз ортчытыны быгато кык нуисьёс. Кырӟанъёсты быдэстэ клубысь «Ветеран» ансамбль. Котькуд йылолъя одӥгзэ гинэ кырӟанэз быдэстыны быгато.

 

Оформление:

1) Удмурт корка пуш;

2)  «Ум вунэтэ вашкалазэ» книгаосын адӟытон.

 

- Ӟечбуресь, пиналъёс, куноос! Туннэ пумиськонмы туж шулдыр луыны кулэ, уго ми тодамы ваёмы но кырӟаломы кырӟанъёсты, кудъёссэ трос ар ӵоже ини кырӟало асьме гуртамы.

 

Шуд-серекты, шуд-серекты,

Шуд-серектэмед кылез.

Кырӟа-вера, кырӟа-вера,

Кырӟан-верамед кылёз.

 

Та кылъёс удмурт калык кырӟанысь. Кырӟанысь валаны луэ калыклэсь мылкыдзэ, сямъёссэ, вакытэз.

 

- Ини кемалась дырысен пӧртэм-пӧртэм крезьгуръёсын жингыртэ асьмелэн вордскем гуртмы. Та кырӟанъёс мур пуштросоэсь, чебересь но аспӧртэмлыкоесь. Кырӟаллязы ужакузы но, шудыкузы но, куно ӧтчан дыръя но, сюан дыръя но, шумпотыкузы но куректыкузы, солдатэ келякузы но, нуныез веттакузы но.

 

- Гуртысь калык ноку но ужатэк ӧз улы. Быдэс гуртэн люкаськыса празднике кадь потазы кизьыны, турнаны. Тани одӥгез турнан вакыт кырӟан:

 

Та турынэз турнаны

Туж секыт вылэм.

Ӵогоно ке куараез,

Туж шулдыр вылэм.

Та аранэз араны

Туж секыт вылэм.

Та культо но пыртонэз

Туж ик шуг вылэм.

Ворттӥськод ке, кутсаны

Туж каньыл вылэм.

 

Яке:

 

Юг-юг ӝужалоз

Льӧмпу сяськаед

Соку тодад лыктоз

Гужемедлэн вуэмез.

Вож-вож ӝужалоз

Чупчи дурын вож турын.

Соку тодад лыктоз

Турнаны но потонэд.

 

Кусооссэс шукко но кырӟало:

 

Марлы турнай, марлы турнай

Возь вылысь вож турынэз.

Али ке но ӧй турнасал,

Италмассэ ке тодсал.

Малы сии, малы сии,

Убо вылысь сугонэз,

Али ке но ӧй сиысал,

Курытсэ ке тодысал.

Малы юи, малы юи

Та курыт но винаез.

Али ке но ӧй юысал,

Кудӟонме ке тодысал.

Малы кутӥ, малы кутӥ

Та яратон туганме.

Али ке но ӧй кутысал,

Куштонзэ ке тодысал.

 

Шутэтскон дыръязы, выль кенлэсь йырысьтыз кышетсэ басьтыса (сялтымзэ басьто), вуэ кушто. Урод сямъёсыд пе, вуэ мед кошкозы, сьӧлыкъёсыд тӧлъя мед тӧлӟозы. Кенлэн ӝожез потэ ке но, анаез солы  валэктэ, таӵе сям уродлы ӧвӧл шуыса. Тыныд, пе, гурт калык сӥзе ужын ӟырдыт, эктыны но кырӟаны чырмыт мед луод шуыса. Со понна сябась каро но, нош ик кырӟало:

 

Возь вылэ но васькыса

Марлы паймиды.

Ми паймим ук эшъёсы,

Италмас сяськалы.

 

Выль кенлэн анаез утялтэ сиён-юонэн. Калык экто но кырӟало.

 

Етӥн октон вакытэ но гуртысь калык ваньмыз потоз вал луд вылэ. Та ужлы сӥзьыса кырӟан кырӟало:

 

Тулкымъяське Чупчи шуред

Вуж арама салкым.

Буртчин кышет вӧлдэмын кадь

Ӵошкыт паськыт возь вылын.

Нылъёс дэмен етӥн ишко,

Шулдыр гурзэс кырӟаса.

Ишкем етӥн

Чурен-чурен тырыло.

Онись учке выйыл пала -

Гажанэз отын гыре,

Вож бамалтӥ трактор ваське,

Нылъёс пала шур дуре.

 

Бер сӥзьыл, толалтэ гуртоос ярато вылэм кунояськыны - ӧтчаськон лэсьто. Араз одӥг пол ке но, котькуд семья отёз вал куное кумаоссэс, ӵыжы-выжыоссэс, бускельёссэс, матысь эшъёссэс. Мон тодэмея, анае но атае котькуд субботае ветло вал кунояны, куддыръя сьӧрло но мыноно луо вал. Ӧтчаськисьтэмъёсты гурт калык лекатэ вал.

 

Тачё шулдыръяськонъёсын куно пумитан, куно утялтон, куно келян кырӟанъёс чузяськылӥзы. Азбаре потыса, куноосты пӧсь винаен, куно пумитан гурен пумиталлязы.

 

Кызьы меда лыктӥды, ӟечесь-а тӥ вуиды?

Чупчи йылысен-а, выжыысен-а?

Гажаса-а, гажатэк-а лыктӥды?

Монэ адӟем потыса-а вуиды?

Гажаса ке вуиды, ӝоген сиёды-юоды.

Гажатэк ке лыктӥды - уд юэлэ.

Ойдолэ, кенъёс, пиналъёс, люкаське,

Одӥг кылын кариськыса вералом.

Кызьы меда лыктӥды, ӟечесь-а тӥ вуиды?

Чупчи йылысен-а, выжысен-а?

Гажаса-а, гажатэк-а лыктӥды?

Монэ адӟем потыса-а вуиды?

 

Яке:

 

- Кытӥ, кытӥ, кытӥ, кытӥ лыктӥды?

- Сюрес вылтӥ, сюрес вылтӥ лыктӥмы.

- Маин, маин, маин, маин лыктӥды?

- Пар валъёсын, пар валъёсын лыктӥмы.

- Малы, малы, малы, малы лыктӥды?

- Сиыны-юыны, сиыны-юыны лыктӥмы.

- Кытын, кытын, кытын, кытын кӧлоды?

- Кабан урдсын, кабан урдсын кӧломы.

- Маин, маин, маин, маин кошкоды?

- Пар валъёсын, пар валъёсын ик кошкомы.

 

Коркаос вашкала вакытъёсы туж бадӟымесь ӧй вал, соин ик ӧтем куноос одӥг ӝӧк сьӧры гинэ уг тэро вал. Кылемъёсыз ӝӧк котыр султыса, куноятон гурзэс лэзё вал.

 

Пичи бекчеын

Ческыт винаед.

Туж пичи коркаын

Чебер кышноед.

Ческыт винаез

Кин уз юылы?

Чебер кышноез

Кин уз яраты?

Ческыт винаез

Юыса кудӟод,

Чебер кышноез

Кема малпалод.

 

Яке:

 

Султы, туганэ,

Ӟеч кыл верало.

Ныл дырысь возем

Вина сектало.

Атас но чортӥз,

Уӵы но сайказ.

Кӧлэ туганэ,

Мамык валесаз.

Султы, туганэ,

Куазь ӟардэ, лэся,

Чик вераськытэк

Кылиськом лэся.

 

Уйшор берозь шулдыръясько вал куноос, кырӟаса, эктыса. Сьӧрлось куноос кӧлыны кылё. Ӵуказеяз мылкыд карисез выльысь лыктэ перепеч, табань сиыны. Собере ини сьӧр куноосты келян дыр но вуэ. Азбаре потыса, вина сектакузы кырӟяллязы:

 

Ӵуж полыштоп,

Вож полыштоп,

Ми кошким ке

Юытэк кылёз.

Ӵуж сяська но,

Вож сяська но.

My вылаз гыртэк кылёз.

Ӵуж басма но, вож басма но

Кесэгаз кестэм кылёз.

Ми тӥ дорысь кошкон дыръя

Тӥляд кӧтты куректоз.

 

Толалтэ, кузь уйёсы, киуж кутыса, ӵем дыръя коркась корка пукыса ветлыло вылэм. Ӵемгес мыныло, пе, вал огназ улӥсь кышномуртъёс доры, малы ке шуоно соослы уката но мӧзмыт  кузь уйъёсы. Мунчоын но люкаськыло вылэм: нылъёс, нылкышноос киуж ужало, нош пиос чаг тыл возьыса пуко. Нылкышноос шуыло вылэм: «Та черсонэ ке ӧй луысал, кинлы кӧт ӝожъёсме верасал».

 

Уе быриз изьыса но,

Нуналы быриз ужаса.

Уе-нуналы ӧз быры,

Быриз пинал дауре.

Ой, эшъёсы, тӥ, эшъёсы,

Ваньды ик тӥ мак сяська.

Мон одӥгнам кылиськем ук,

Ӵуж ӟег пӧлы - ӵуж сяська.

Ӵуж ӟегез аралоды но,

Лыз сяськаез лёгоды

Тӥни озьы пинал йыры

Будэмъяз ӝоже кылёз.

Ваньзы ик уж борды кутскыса, кырӟатэк ӧз кыльы ни.

Уг но кырӟа шуисько вал но,

Уг но вера шуисько вал.

Кырӟась-верась карылӥзы

Та туала калыкъёс.

 

Люкаськыса егит нылъёс но пиос вуо вал пукисьёс доры, ваньзэ лӧпкыто. Ма шумпотон ук со: нылпитэк корка - шудтэм корка. Егитъёс но кырӟало:

 

Тӧдьы кышет нуллэме вань,

Кин ӧз нуллы, мед нуллоз.

Яратонэн улэме вань,

Кин ӧз улы - мед улоз.

Сьӧд картузэд жаль ке потэ,

Зор улын эн нуллы вал,

Выль туганэд жаль ке потэ,

Выльёссэ эн утча вал.

 

Пукыны лыктэмъёс коркалэн кузёосызлы кылало-бурало вылэм «Ыжгонэд но пӧзьыд-носкиед туж небыт мед луоз».

 

Нош коркалэн кузёосыз пукыны лыктӥсьёсты тодыса, выжъёсты чылк-чылк мисько, корказэс шуныт эсто, ӝӧк вылэ пукто сюкасен сарва, пыжем сиён.

 

Нош кыӵе шулдыр ортчылэ вал гуртын сюан. Пятницае кутскыса, арня нуналозь кыстӥське вал со.

Эмеспи ласянь ӧтем сюанчиос нуназе бере удмуртарня нуналэ мыно бызись ныллэн гуртаз. Отын ныл келисьёс «дунтэк» пырыны медаз быгатэ шуыса, ӟезыез ворсало. Нош сюанчиос чупыресъёсыз кенер вамен ик тэтчыса пырыны выро. Сюанчиос пырем бере маскаръяськыса, бызись ныл кадь дӥсяськыса, пересь кышномурт потэ.

 

Туж вашкала дыръя кензэс лушкалляло вылэм. Со сямез-а чакласа, али но бызись нылэз пыдло вато, эмеспи сое одно ик утчаны кулэ.

 

Бызись нылэз шедьтэм бере гинэ, ваньмыз пуксё ӝӧк сьӧры. Ӵукнаозь ик шулдыръясько ини бызись ныл дорын, бускеле потало. Кӧснуналэ ӵукна эмеспи бызись нылэн анай-атайёссылы йыбыртто. Соку ини туж ӝож кырӟало:

 

Мон понна уӵыез уг чирды -

Чирдэ тулыс шулдырлы.

Сяська потоз но возьёс вылэ,

Сюлэмъёсмес бугыртоз.

Соку мынам но тодам лыктоз

Яратоно туганэ.

Куке но мон тӥ пӧлын ик вал

Таре монэ люкизы.

Шудэ, эшъёсы, шудэ-серектэ

Монэ ӵемгес вералэ.

Мон понна уӵыез уг чирды

Чирдэ тулыс шулдыръя.

 

Сюанчиос но келясьёс мыно эмеспи доры. Отын ини кенлэсь быгатэмлыксэ эскеро: ву вайыто, табань-перепечь пыжыто. Сюанчиос ведраысь вузэ палькканы выро, пыжиськыкуз муръёез пытсало. Соку ик валес валисько, пирдан учко. Сюан гурез мытэ вылэм сюанлэн йырыз - матысь ӵыжы-выжы.

 

Ойдолэ, сюанъёс

Кырӟалом, кырӟалом.

Ой, Дунай гинэ но

Ой Дунай вал.

Ой, бен шуыса но

Ӟаник вералом.

Жингрес, жингрес

Сюанъёс кырӟалом.

Ой, Дунай...

Кинлэн та чеберез?

Кинлэн та шулдырез? Ой, Дунай гинэ...

Надялэн чеберез, Колялэн шулдырез.

Ой, Дунай гинэ но...

 

Бускеле потыку тазьы кырӟало:

 

Ойдолэ, ойдолэ,

Люкаське, люкаське

Ой, Дунай гинэ но...

Ойдолэ, ойдолэ,

Бускеле потоме.

Ой, Дунай гинэ но...

 

Эмеспи дорын валес валиськыку:

 

Сюан вань, кунян вань,

Ӵӧжмы но куать пузам.

Ой, Дунай гинэ, но

Понедельник, вторник,

Среда, четверг,

Пятница, суббота

Арня нунал ӝытазе

Кык кузя выдоды,

Куинь кузя султоды.

Ой, Дунай гинэ но

Ой, Дунай вал.

Ой, бен шуыса но

Ӟаник вералом.

 

Микола - 19 декабрь - Зар Медло гуртмылэн быръем праздникез вылэм. Та нуналэ Дэбесын туж бадӟым базар, пе, луылэ вал. Няньлэсь дунзэ пуктэ Микола нунал, шуыло вал. Нянь вузасьёс трос ке, няньлэн дуныз синэ, нош вузасез ичи ке - йылэ.

 

Миколалы пӧрасько, сур пӧзьто, варсь витё вылэм. Та праздник кыстӥське 2-3 нунал. Микола праздникен герӟаськем кырӟан таӵе, пе, вал.

 

Микола, Микола

Вашкала дуно праздник.

Кумъёслы дася брага,

Кумаослы - шаньги.

Петырлэн юэз лачак

Базаре нуллӥз ӵапак,

Микола ке дун пуктоз –

Юэз ваньзэ вузалоз.

Базарын вузась лачак

Басьтӥсез нош чик ӧй лась.

Юлэн дуныз туж ичи –

Петырлэн мылкыд ичи.

 

Данъяськылӥз гурт калыкмы армие мынӥсь пиосыныз. Со дыре армие ветлӥсьтэм пиосмуртэ «негодяй» но, пе, шуыло вал. Солдатэз быдэс гуртысь калык келяны потэ вал.

 

Гурт пумын сылэ вал туж веськрес кызьпу. Котьку но, урам кузя келясськыса, гурт калык татчы люкаськоз вал. Татысен, ӟеч кылъёс вераса, кузь сюрес вылэ келялозы вал пияшез.

 

Нош солэсь азьло, повестка басьтэм бераз, рекрут ветлылэм коркась корка: ӵыжы-выжыосыз, бускельёсыз, эшъёсыз доры туг - ас сярысьтыз тодэ ваён тодмет - шуккыса кельтэ. Озьы ик кошкон нуналаз ас гуртаз но туг шукке вал. Со тугез шуккыку котьку но ӝож, синкылиез поттоно кадь, гур чузъяськылӥз.

 

Эк иге,

Бен иге шуоме но

Ӟаное гинэ.

Эх ӟаное гинэ,

Э шуом вераськом но ю

 

Та гурез кырӟаллязы рекрут гур котыртӥ котырскыкуз но, коркасьтыз потыкуз но, гид-куа котыртӥ ортчыкуз но.

 

Бен, армие келян гуръёс мӧзмытэсь, уго соос люкиськонлы.

 

Борозда лёган пыдъёсы

Кузь сюрес усёз.

Герыез возён суйёсы

Пыӵал возьыны кылизы.

Коръёсты ӝутъян пельпум

Кылёз солдат пуйылы.

Та веськрес бадяр мугоры

Кылёз ук шинель нуллыны.

 

Яке:

 

Ой, мемие, ой, дядие,

Кызьы меда кылёды.

Кышетъёсын шонаса но

Пӧсь синвуосын гуньдыса.

Бер сӥзьыл вожектэ ӟег бусы,

Писпулэсь люкисько куаръёсыз.

Со вакыт мон тонэн люкисько -

Армие кошкисько гажанэ.

Туннэ кадь ик тодам вайисько

Садэтӥ ӟардытозь

Кырӟамы-верамы со ӝытэ,

Кырӟанын мылкыдмес верамы.

Оскисько, сюлэмад мур возёд

Асьмелэсь яратон кусыпмес

Оскисько, мусое, сак утёд

Асьмелэсь яратон странамес.

Вазь тулыс вожектэ ӟег бусы

Писпулэн потыло куаръёсыз

Со вакыт пумиськи мон тонэн

Армиысь бертыкуд гажанэ.

 

Капчи-а, ӧвӧл-а, но гурт калыкмы шумпотонзэ но, куректонзэ но  кырӟан пыр лэзьылӥз.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru