Версия для слабовидящих

Ашальчи Окиез буре вайыса

Название материала: Ашальчи Окиез буре вайыса

 

Содержание: Литературно-музыкальной пушсузьет

 

Катанчи усьтӥськемлэсь азьло кылӥське Г. Корепановлэн Ашальчи Окилэн кылъёсызъя «Мон тодам ваисько» кыpӟaнэз. Усьтӥське занавес. Сцена буш. Паллян палан – пичи ӝӧк. Сценалэн пыдлось борддораз – Ашальчилэн бaдӟым портретэз. Сцена вылэ потэ егит ныл. Солэн кияз сяськаос. Кырӟан йылпумъяське.

 

1-тӥ ныл: Акилина Григорьевна Векшиналы – дышетӥсьлы но врачлы, нырысетӥ удмурт поэтессалы Ашальчи Окилы сӥземын туннэ ӝытмы. Та залын пукисьёс, оло, сое тодо на, дыр. Огез умойгес, мукетыз ӧжытгес. Нош мыным соин пумиськылыны ӧз ни кылды. Со сярысь тодӥсько творчествоезъя, тодмо учёнойёслэн, писательёслэн гожтэмзыя гинэ. Акилина Григорьевна Векшинаез – Ашальчи Окиез – ас синмыным ӧй ке но адӟылы, солэсь нимзэ данъяны мон лыктӥ киям сяськаен. Аслэсьтыз поэтической нимзэ со Ашальчи сяська нимын герӟаз. Озьы бере, туннэ пумиськонамы солэн нимыз но тусыз сяська кузьымен герӟамын мед луоз. Таиз ӝӧкмы – Ашальчи Окилы. (Cяськаоссэ ӝӧк вылэ понэ.)

         Калык сюлэмын улэп Ашальчиез

         Санэ понэ музъем – аныкаймы.

         Шумпотыса чирдӥсь тюрагаез

         Ыстэ милем тулыс саламеныз.

         Вунэтонтэм мед син азе пуктоз,

         Туймы шурвыл кадь мед со чилялоз,

         Тодэ вайытыса вань эшъёссэ.

         Гожъяськонын зуркась нуналъёссэ.

 

Потэ кыкетӥ ныл.

 

2-тӥ ныл:  Тани, учкы ай, «Гудыри» газетад «Удмурт нылъёслы» шуыса гожтэмын.

 

1-тӥ ныл: Оло, озьы ик гожтэмын-а? «Удмурт нылъёслы» шуэмын-а?

 

2-тӥ ныл: Око-о (лыдӟе). Гажано эшъёсы! Та кылъёсме тӥледлы верасько, тӥледыз яратыса, тӥледыз жаляса... Пичи дырысьтымы югыт нуналэз aдӟытэк кадь быдэсмимы асьмеос та дырозь. Пичи дыръямы кӧкыын кылльыкумы ик вуж правительство асьмемыз тарказ, югыт сюресэ потыны эрик ӧз сёт. Соин асьме пӧлысь туж шудоез гинэ, пичи дыръяз дышетскыны ветлыса, визьмо кылъёс кылӥз, дунне бергамез валаз. Вордэм анайёсмы но, дышетсконлэсь пайдазэ валатэк, пичи дыръямы сюресмес ӵоктазы... Озьы тӥни, дышетскеммы потыса но, пеймыт кылим асьмеос, яратоно эшъёсмы. Асьмеос но пиосмуртъёс мында ик валасалмы ке, соос асьмемыз ӧй ултӥясалзы, соос асьмемын кенешыса улысалзы, йырсиды кузь но визьды вакчи ӧй шуысалзы. Визьмы, соос шуэм сямен, вакчигес-а? Визьмы вакчи ӧвӧл. Только дышэтскыса со визез вӧлятыны кулэ... Табере воштӥськиз, пеймыт калыклы ин усьтӥськиз. Ваньмы потом югыт сюресэ, ваньмы адӟом ӟеч улонэз. Калыкез югыт сюресэ поттӥсь революция мед вӧлдӥськоз быдэс дуннее! Акилина Векшина.

 

1-тӥ ныл: Кин-о со Векшина?

 

2-тӥ ныл: (залэ). Кин-о со – Акилина Векшина?

 

Сцена вылэ потэ Ашальчи Оки.

 

Ашальчи: Мон со – Векшина... Ӟечбуресь, нылъёс, гажано егит эшъёсы!

 

1-тӥ ныл: Ой, оло, ачид ик дӥсьтӥськод-а газетэ сыӵе кылъёс гожъяны?

 

2-тӥ ныл: Кыӵе шуныт кылын вазиськемед тон милемлы!.. (эшезлы). Ойдо вань эшъёсмылы вераломы, кинэн пумиськеммес! Асьме доры Векшина лыктэм шуомы!

 

Шумпотыса бызьыса кошко.

 

Ашальчи: Грах село вӧзысь Кузебай гуртын 1898 арын вордӥськи мон. Грах селоын двухклассной земской школаын дышетскыкум, удмурт нылъёс пӧлысь чылкак огнам вал. Нырысь пал ӟуч кылэз чик уг тодӥськы вал. Собере ас ёзъёсме сутӥ но азьлань дышетскыны мынӥ – Карлыган гуртысь Центральной удмурт школае. Сое йылпумъям берам Ӟаны школаын ужай, собере – Бадӟым Уча дорысь гуртын. Огпол эше шуэ: «Бадӟым Учаын ӵуказе спектакль луоз. Мыномы-а?». Спектакль кылэз мон ӧй вала, но юаны возьдаськи, дышетӥсь ке но, со кылэз уг тоды, шуозы кадь потӥ. Мынӥмы. Спектакль туж кельшиз. Учаысь тодмо дышетӥсе спектакль бере юа ини: «Кин главной рольын шудӥз, тодӥськоды-а?» – «Уг, – шуисько. – Со, пе, Кузьма Чайников, литературной нимыз – Кузебай Герд. Тодматскемды потэ-а?». Ойдо, кошкы, шуисько, улэп поэтэн кызьы вераськом мон, возьдаськисько. Кошкыны турттӥсько вал ини но, ӧз лэзе. Кузебай Гердэн тодматӥзы. Ой, кӧня кылбуръёс лыдӟиз соку со мыным! Собере ини милям соин творческой сюресмы туж юн герӟаськиз, шумпотонмы но, куректонмы но одӥг сюресэтӥ вамыштӥзы.

(Kыpӟaн «Кин-о тон»)

 

Ашальчи:

         Вордӥськем музъеме,

         Вордӥськем шаере,

         Туж мусо потӥськод,

         Туж шулдыр адскиськод.

         Паськытэсь бусыяд

         Кизем ю удалтэ, 

         Кизем ю вуыкуз

         By тулкым кадь ветлэ.

         Возь вылын турынэд

         Чиляса кадь улэ,

         Чебересь сяськаед

         Сюлэмез буйгатэ.

         Нюлэскад писпуэз

         Кораса быдтонтэм,

         Нюлэслэн шулдырез

         Бертэмед потонтэм.

         Со понна ик дуно

         Вордӥськем музъеме,

         Со понна ик мусо

         Вордӥськем шаере.

 

Ашальчи кошке. Потэ Кенеш.

 

Кенеш: Ашальчи Окиез тодымтэез ӧвӧл ни, дыр. Кудӥз Ашальчиез ассэ уг ке но тоды, солэсь кылбуръёссэ, веросъёссэ тодэ. Ньыль ар талэсь азьло «Сюрес дурын» нимо кылбур книга кылдӥз. Со – Ашальчи Окилэн гожтэм книгаез. Та книгаез мон лыдӟыса пырпотӥ. Пумаз вуытозям книга вылысь синме басьтэме ӧз луы. Лыдӟыкум таӵе удмурт ныллэн, удмурт кышнолэн улэмез син азям пуксиз. Ашальчилэн гожтэмезлы туж синмаськи. Шонерзэ вераса, мынам талэсь азьло такем сюлмам пыӵамон удмурт кылбуръёсыз адӟеме, лыдӟеме ӧй вал на… Зэмзэ но, вылласянь эскерыса, Ашальчи аслэсьтыз кылбуръёссэ чеберъяны уг сюлмаськы, соослэн пуштроссы узыр, кылыз валамон, мусо,  ваньмыз интыяз пуктэмын.

 

Потэ Ашальчи.

 

Ашальчи:

         Тон юад мынэсьтым:

         – Марлы бен кылбуръёс гожъяськод,

         Чик юнме кужымдэ быдтӥськод?

         Бен юад-а, юад-а, эше,

         Бусыын ӵуж кисьмам сезьылэсь

         Марлы со уй-нунал ӵаштыртэ,

         Уй-нунал ас понназ вераське?

         Шур вулэсь нош юад-а,эше,

         Марлы со дугдылтэк жильыртэ,

         Дугдылтэк ас понназ куаретэ?

         Уӵыед но тулыс садъёсын

         Марлы бен ӝыт-ӵукен весь чирдэ –

         Тон юад-а сое?

 

Ашальчи кошке.

 

Кенеш: Ашальчи, пе, яратон сярысь трос гожъя. Яратон сярысь гожъямаз «мещанствоез» но вань шуо. «Кык гожтэт» нимо кылбураз таӵе интыез вань:

         «Одӥгзэ мон гожтӥ

         Тӧдьыё кагазэ,

         Нош чагыр кагазэ

         Мон гожтӥ мукетсэ...».

 

Удмуртъёс, пе, кагазлэсь туссэ уг чаклало, соослы тӧдьы но, чагыр но одӥг. Мынам чакламея, Ашальчи чагыр кагаззэ калык кырӟанысь басьтэм. «Ӵуж бубыли сьӧръёсы чагыр гожтэт лэзём шат?» – шуыса удмуртъёс кырӟало. Та но «мещанство», оло?..

 

Потэ пумиськонэз нуись ныл.

 

1-тӥ ныл: Нош тани кылзэ ай, «Кык гожтэт» кылбуръя кырӟаназ кыӵе ке мещанство шӧмзэ валалоды-а?

(Kыpӟaн «Кык гожтэт».) Потэ Ашальчи.

 

Ашальчи: 1919 арын мыныса, 1921-тӥ арын мон Казаньысь рабфакез быдтӥ. Гужемез ортчытыны гуртэ бертӥ. Гуртын куиськи, дэра гужатӥ, турнай, арай, кутсаськи. Вапум шулдырен ӧз ортчы: удалтымтэ нянь калыклэсь мылкыдзэ зӥбиз. Писпу куар вылэ ӵуж усьыны кутскиз но, Кузонэ мыныны дасяськи. Саламъёс вӧзы анай одӥг бадӟым мешокез куасьтэм нянен тырмытӥз. Куасьтэм нянь пӧлы кенаклэсь лушкем ог дасо юдэс куасьтэм сӥль понӥз. Собере, вань мешокъёсме думылӥз но, берпум кылъёссэ вераз: «Оки, та мешокъёстэ нош ыштылод ини. Бертэмедлы быдэ мар мында мешокъёс вурылӥсько. Кин выжые мыныса, сыӵе сапрес луэмед. Атаед но лачмыт вал, ачим но ӝикыт кадь». Та кылъёссэ вераз но пыдлось лулӟиз: ыштылэм мешокъёсты тодаз ваиз, вылды. «Ойдолэ, вӧсяськыса потоме ни» шуыса вырӟе. Ори апай, мон понна анае кадь ик сюлмаськись кышномурт. «Мон уг вӧсяськиськы ни табере», – шуисько пумитаз. Озьы шуыса, котыр бур киме сётӥсько но коркась потӥсько, анаен Ори апай мон сьӧры бӧрдыса пото: «Дышетэм мурт инмарез вунэтэ вылэм. Марлы меда нылпиме дышетыны сётӥськем», – бӧрдэм пыр шуэ анае. Сюдэм Эрвок валмы ворттэ. Вордӥськем гурт уг адӟиськы ни. Мон Кузонын. Мешокъёсме пельпумам ошыса, Муратовская шуон ульчае патерам вамышъясько. Мешокъёсме отчы кельтыса, университетэ мынӥсько. Кыдёкысен ик солэсь тӧдьы зӧк юбооссэ адӟыса, сюлэм шумпотэ тэтчаны кутске. Ура-а! Пырисько университетэ. Гожтӥсько медфаке куриськон. Куриськон гожтӥ но азьлане сярысь малпасько. Медфакез быдтӥ кадь потӥсько ни, «Удмурт доктор!» шуисько ас поннам ӝыт куро валес вылам. Со куспын ик дорысь ваем пыжем сӥльме йырйисько. Нуналлы быдэ ӵукна мон университетэ кошкисько. Отын библиотекаын патерын кадь кезьыт ӧвӧл. Пуконме укно доры матэ пуктӥсько но... адями йыркобы лыос шоры учкон куспетӥ син азе кулэтэм макеос пуксё: шумес быдӟа сукыри нянь, зыр зӧкта колбаса...

(Кырӟан «Та бадӟым городын»)

 

Ашальчи:

         Юонлы дасяськид,

         Вань уждэ бергатӥд: 

         Сур пӧзьтӥд, мисьтаськид,

         Пыжиськид, вуриськид.

         Ӵын пӧлын ӵынаса,

         Арактэ виятӥд.

         Ужаса-ужаса,

         Пуны кадь ик жадид.

         Ӵуказяз ӧтчаськид,

         Лумбыт тон сектаськид.

         Сектаса винаен,

         Вань гурттэ кудӟытӥд.

         Ӝыт келяд кунодэ,

         Изьытӥд нылпидэ.

         – Шутэтско ни, – шуид,

         Кылльыны тон выдӥд.

         Со куспын ӟезьыяд

         Олокин йыгаськиз.

         Кудӟыса кузпалэд

         Олокытысь бертӥз.

         Лек тыныд со вазиз,

         Чик юнме даллашиз,

         Сӧсыртӥз, погыртӥз,

         Пуныез кадь жугиз,

         Собере со изиз.

         Тон гинэ, куанере,

         Чик ӧд изьы уез:

         Эзельдэ ӧтьыса,

         Мед куло шуыса,

         Уез уйбыт бӧрдӥд,

         Ӝожедлы чидатэк,

         Пуны кадь ик вузӥд,

         Пуны кадь ик!..

 

Потэ Кенеш.

 

Кенеш: Ашальчи Оки нылкышнолэсь шуген, курадӟыса улэмзэ туж умой, шонер возьматэ. Солэсь кылбуръёссэ лыдӟыку олокӧня сюрс удмурт кышноослэсь, удмурт нылъёслэсь малпаськемзэс, мылкыдзэс лыдӟиcькoд кадь. Нош сыӵе улонысь потон амал сётыны уг быгаты.

 

Ашальчи:

         Ой, шулдыр, туж шулдыр ульчаын,

         Туж шимес ук, шимес кеносын...

         Вань нылъёс юмшало ульчаын,

         Мон гинэ пукисько кеносын.

         Кеносын-четлыкын ӝокасько,

         Мемилэсь зулемзэ кылӥсько.

         Мемилэн зулёнэз быронтэм,

         Кузь сюрес кадь, йылтэм но пумтэм.

         Уйшорозь со монэ тышкаське,

         Ӝыт шудны лэзёнтэм кыл сётэ...

         Ас пинал даурез ортчемен,

         Шудэмез, юмшамез вунэмен,

         Чик уг вала пинал мылкыдэз –

         Серекъян но шудон потэмез!

(Кырӟан «Куддыръя»)

 

Ашальчи:

         Лулы мынам

         Возь выл бубли ке но –

         Марлы меда

         Бурдыз сӧсырмылэм?

         Сюлмы мынам

         Чебер кырезь ке но –

         Марлы меда

         Сиез тӥяськылэм?

         Мылкыд мынам

         Зарни манет ке но –

         Марлы меда

         Жильы борды со думылэм?

(Кырӟан «Бублиос»)

 

Гудыри: Али вань ужаса улӥсьёс пятилеткаез быдэстон бордын революционной кужымен но мылкыдын тыршо, нош Ашальчилэн кылбуръёсыз пятилеткаез быдэстон котыре уг бинялско, социализмо улон лэсьтон ужлы пумит луо. Соин ик таӵе кылбуръёсыз ӵушкано!

 

Ашальчи:

         Толон ветлӥ возь вылъёстӥ

         Тӧдьы сяська уно октӥ...

         Яратонэ ӧз ке лыкты,

         Уг утялты – мед куасьмоз,

         Пудо сины мед кылдоз...

 

Гудыри: Оки, нылкышноосыз кужен сюресысь потты, ыбес пуӵъёссэс кора, тӥя, кеся!

 

Ашальчи:

         Бамме миськиз, гадьме коттӥз

         Оло синву, оло лысву...

         Яратонэ ӧз ке тоды,

         Уг ӵушылы, мед усёз,

         Тӧдьы буслы мед пӧрмоз.

 

Гудыри: Оки, кышномуртъёстэ бaдӟым-бaдӟым сюрес вылэ потты. Киязы машина сёт. Сюресъёссэс асьсэос мед лёгалозы, корка кузё мед кариськозы.

(Кырӟан «Марлы меда»)

 

Гудыри: Казаньысь университетэз йылпумъяса но син эмъясь врач специальность басьтыса, 1928 арын 20 куартолэзе Акилина Григорьевна Векшина ужаны кутскиз Юкаменскын. Районэз трахомалэсь мӧзмытон удысын вань луонозэ но, луонтэмзэ но лэсьтӥз.

 

1-тӥ ныл:

         Инмар кадь Окимы – чылкыт син кузьмасьмы

         Нэнэ туссэ-буйзэ солэсь возиз мудор вылаз.

         Зарни инмарезлы музэн, сюсьтыл ӝуатъялляз.

         «Эн вунэты, нылы, – шуоз вал нэние, –

         Ноку эн вунэты, мыным со син кузьмаз.

         Синкылилэсь, урлэсь – вирлэсь пеймыт синме

         Олокызы чылкытатӥз, адӟытозям эмъяз».

 

Ашальчи:

         Мон визьтэм, туж визьтэм вал азьло:

         Шунды пыр векчи зор усьыку,

         Ин шоры вуюись ӝужаку, –

         Со чебер вуюись кадь дэрем

         Куэме луысал шуса,

                  малпасько вал азьло...

         Уйёсын нош, вылэ учкыса,

         Кизили тылъёсыз адӟыса, –

         Соосыз чыртыкыш лэсьтыны

         Амалы ке лусал шуыса,

         малпасько вал азьло...

 

2-тӥ ныл: Ашальчи Окилэн кылбуръёсыз, ужаса улӥсь нылкышноослы номыр но ӟечсэ уг сёто. Солэн кылбуръёсыз быдэсак есенинщина: куашкам, бӧрдон, курадӟон мылкыд. Ваче куто кизэс, мӧзмо кык кызьпуос.

         Оломалы йыре лыкто сюлэмшуго аръёс.

         Зубектыны кутске мугор, малпан йыромылэ,

         Даур-вотэс янгышъёсы Оки но сюрылэм:

         Эзель учкем солэн синмаз комак синмын.

         Танӥськоно? Кинлэсь? Марлэсь? Малы?

 

Ашальчи:

         Шудэд тонэ алдаз ке,

         Эн чигиськы, эн бӧрды.

         Секыт нунал лыктӥз ке,

         Чидатӥськы, оскиськы:

         Куддыр вапум секыт ке но,

         Азьлапалан ӟeч нуналъёс.

         Ваньмыз ортчоз, кошкоз –

         Ортчем вапум мусо потоз.

 

1932 арын янгыше уськытыса,  монэ 1933 арын куать толэзь ӵоже тюрьмаын возизы. Нуналлы быдэ следователь допросэ ӧтьылӥз, нуналлы быдэ шуылӥз: «Тон националистка, тон калыклэн тушмонэз». Огпол нош ик допросэ ӧтизы. Учкисько: ӝӧк сьӧрын мукет следователь  пуке. Валэктыны куриз, кызьы мон валасько национализмез. Мон шуи: национализм – со ас калыкед понна сюлмаськон, солэсь культуразэ ӝутыны тыршон, солэсь чебер мылкыдзэ кылбуръёс пыр веран. Следователь паймиз, кызьы, пе, тон татчы сюрид, национализм сярысь тодон-валанэд но ӧвӧл бере. Мон шуисько: «Мон – националистка. Мыным нуналлы быдэ со сярысь вераллязы, табере аслам националистка луэмелы оскисько ни». Следователь шуиз, мон туннэ тонэ мозмытӥсько, гуртад бертэмед луоз. Алнашам вуи но, монэ пичи пие уг ни тодма... Кузпалы но туж кышкатэмын. Соку мон аслым ачим кыл сётӥ: та нуналысен мон удмурт литератураез вунэтӥсько, мон ноку номыр ӧй гожъя, мон поэтесса ӧвӧл. Ваньзэ удмурт книгаосме но рукописьёсме сюе соги... Вань тодэм-валамме но кужымме сётӥ врачлэн ужезлы. Районын туж зол алямын вал трахомаен висён, 4–5 классэз йылпумъям нылъёсты люкаса, трахоматозной сестраосты дасяны курсъёс кылдытӥ.

 

Ашальчи кошке («Священная война» кырӟанлэн аккордъёсыз).

 

Пото Пи но Нылъёс.

 

Пи:

         Ож бугыри туж лек гудыръяку,

         Котьку сямен тон азь радэ султӥд

         Уй-нуналэз ӧд валалля, хирург,

         Кӧня солдатъёслы улон сётӥд!

 

1-тӥ ныл:

         Мултановский госпиталь. Можга.

         Туймы, Висла, Одер – трос шуръёс…

         Операциос, ӵын, тыл, госпитальёс...

         Ож виртэк уг ортчылы уга...

 

Пи:

         Алнаш гуртад – картэд пичи пиен,

         Нош тон отын сӧсыръёсты эмъяд.

         Кулон киысь троссэ утьылэмен,

         Луид бен тон но вормонтэм солдат!

 

2-тӥ ныл:

         Чылкыт син удмуртъёслы кузьмась

         Туж усто хирург но ук вылэм.

         «Калык врач» дано нимыз сяна,

         Ож награда гадь вылаз солэн.

 

Пи:

         Мед воректоз уй кизили выллем

         Тыныд тау карон калык кылмы.

         Тон данлыкез удмурт шаермылэн,

         Ваньмыз тыныд – сюлэм шунытъёсмы!

 

Нылъёс  но Пи кошко, потэ Ашальчи.

 

Ашальчи: Фронтысь бертӥ но нош ик трахомаен нюръяськыны кутски. Öвӧл, фронтовой наградаосы мынам уно ӧвӧл, только со понна шат мон ож сюресэз кутсконысеныз пумозяз ортчи? Мон калык рад быдэстӥ аслэсьтым долгме. Тӥни кыӵе мынам данъяськыса вераны кылы.

 

Потэ Агитатор.

 

Агитатор: 1956 ар! Вунэтэмын но саптам нимъёс улӟытэмын!

 

Потэ мӧйы Ашальчи. Со ӝӧк сьӧры пуксе, гожтэтъёс гожъяны кутске. Гожтэтъёсты сцена вылэ потэм нылъёс но пиос огзы бӧрьсьы огзы басьто но микрофон азьын лыдӟо.

 

– Аркадий Николаевич Клабуковлы. Кыӵе паймоно кадь умой дыръёс вуизы! Ашальчи Окилэн трос но трос аръёс ӵоже лултэм сямен улон вакытэз ортчиз. Чутрак шуи аслым: Гожъяло! Бере кылеме кышкатэ вал, табере уг кышкаськы ни...

 

– Пётр Кириллович Поздеевлы. Мон та дырозь номыр валаса уг вуиськы на, со произведениосыным пумиськем берам. Умме но, сиён ческытэз валанме но ыштӥ ини, трос кыскыны кутски кадь, малы ке шуоно, сюлмы тыл йылын кызьпу туй выллем сутске но шымырске.

 

– Аркадий Николаевич Клабуковлы. Кылбур гожъяны ӧжыт бергес ӧвӧл-а ни? Скрипач кызь вить ар кияз смычоксэ ӧз ке басья, со умой шудыны быгатоз-а? Конечно уз! Солы выльысь дышетсконо. Диалектикалэн законэз чурыт: улон ог интыяз уг сылы, азьлань мынэ. Тани кырӟа вылэм табере тыр куараен, нош... куара ӧвӧл.

 

– Герман Алексеевич Ходыревлы. Асьме удмурт писательёс туж ӧжыт гожто нылпиослы. Максим Горький нылпи художественной литератураез «великая держава» шуыса дунъяз. Писательёсмы табере данак ини, нош нылпиослы поттэм книгаос ӧӝыт, тужгес но школьной арлыдъёслы. Шудо луэ! Утьыны тырше «бaдӟым державаез»...

 

Мӧйы Ашальчи кошке. Микрофон доры лыктэ пумиськонэз усьтӥсь ныл.

 

Ныл:

         Малпаськод ке улонзэ куддыр,

         Йырсиед но я ӵогыр султэ...

         Окимы нош вормисен потэ –

         Ас лякытэныз луэ батыр.

         Ноку но ӧвӧл вунэтоно:

         Макем яратӥз со калыксэ.

         Егитъёслы ӵемгес, дыр, верано

         Юг югдытыса ӟeчлыкъёccэ.

 

Занавес (кырӟан «Мон тодам ваисько»).

 

Дасяз Эвелина Степановна Данилова, Юкаменск ёросысь Ф. Ф. Павленков нимо центральной библиотекаын ужась

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru