Версия для слабовидящих

Удмурт Элькунысь Йӧскалык библиотекалэн славян гожтэтлы 1150 ар тырмонэзлы сӥзем ужрадъёсыз

Удмурт Элькунысь Йӧскалык библиотекалэн славян гожтэтлы 1150 ар тырмонэзлы сӥзем ужрадъёсыз

21-тӥ куартолэзьысен 24-тӥ куартолэзёзь 2013 арын Удмурт Элькунысь Ӥӧскалык библиотека ужрадъёс ортчытэ, кудъёсыз славян гожтэтлы 1150 ар тырмонэзлы сӥземын.

Славян гожтэт но лулчеберет нунал сьӧлыктэм Кирилл но Мефодий агай-вынъёсты тодэ вайыса тупатэмын, Россииын но вань мукет славян кунъёсын пусйиське.

 

21–24-тӥ куартолэзе Удмурт кун университетлэн филологи факультетаз дышетскисьёсын дасям ужрад ортчоз, кудъёсыз школаосын дышетскисьёслы вералозы Кирилл но Мефодийлэн улонзы но югдытон ужзы сярысь, кириллица азбукалэн кылдэмез сярысь. Тунсыко юанъёслы валэктонъёс сётозы, вань-а вал удмуртъёслэн кириллицаозь гожтэтсы но зэмсэ вераса кыӵе азбука кылдытӥз Кирилл, маин дуно луо кык сьӧлыктэм вынъёс славян но славян луисьтэм калыкъёс понна.

 

24-тӥ куартолэзе 10.00 часын М.Т. Калашников нимо музей-адӟытон огъетлэн юртаз (Бородина ур., 19) Москва кун университетысь профессорлэн Алексей Николаевич Варламовлэн «Кто есть кто в русской литературе» лекциез ортчоз. (А. Н. Варламов – филолог, литературовед, публицист, гожъяськись, «Жизнь замечательных людей» серилэн авторез, поттӥз Михаил Пришвин сярысь, Григорий Распутин сярысь, Александр Грин сярысь, Андрей Платонов сярысь, Алексей Николаевич Платонов сярысь книгаосты, Ӟуч писательёслэн огазеяськонзылэн ёзчиез ).

 

24-тӥ куартолэзе 15.00 часын Свято-Михайловский соборын «Письменность – великий дар потомкам» книга адӟытон усьтӥськоз. Ужрад вӧсяськон бордысен кутскоз. Славян гожтэтлэн азинтӥськемез сярысь вералозы Удмурт кун университетысь филологи факультетысь профессор В. Мосалева но Москва кун университетысь профессор А. Н. Варламов. Адӟытонэн Удмурт Элькун йӧскалык библиотекалэн шер но дуно ужкагаз ёзэтэныз кивалтӥсь С. Б. Русских тодматоз.

 

Адӟытонлэн нырысетӥ люкетаз – «Докириллическое письмо славян» –книгаос но статьяос огазеямын, кудъёсаз эскериське кириллица дырозь кутӥськись аспӧртэмлыко гожтэт – славян руника (споръяськонлы кутскон сётӥз«Сказание черноризца Храбра "О письменах"). Та юанъёс мургес учкемын В. А. Истринлэн ужъёсаз («1100 лет славянской азбуки», «Возникновение и развитие письма»), А. А. Медынцевалэн ужъёсаз («Грамотность в Древней Руси»), Б. Рыбаковлэн ужъёсаз («Язычество Древней Руси») но мукет.

 

Кыкетӥ люкет – «Славянская азбука и славянские просветители» – сьӧлыктэм Кириллэн но Мефодийлэн улон но югдытон сюресъёсыныз тодматоз. Разделэ озьы ик кык славян азбукаослэн ог-огенызы герӟаськытэк улэмзы сярысь книгаос но статьяос пыремын (С. Бернштейн «Константин-философ и Мефодий»; Б. Флори «Сказания о начале славянской письменности», «Судьбы кирилло-мефодиевской традиции после Кирилла и Мефодия»; А. Папина «Происхождение славянской письменности» но мукет).

Куинетӥ люкет – «Памятники славянской письменности» – киын гожтэм, печатлам но факсимиле амалэн дасям вуж славян но вуж ӟуч кылын ужъёсты огазея, Удмурт Элькунысь Йӧскалык библиотекалэн шер пумиськись но дуно ужкагаз ёзэтысьтыз славян но ӟуч книгаосты. Возьматэмъёс пушкын луозы факсимиле амалэн дасям «Жития Кирилла и Мефодия»; киын гожтэм Ефрем Сиринлэн «Ирмологий на крюковых нотах» но «Поучительные слова» книгаосыз, нырысь печатлам «Требник» (1647) «Сборник из 71 слова» (1647), «Триодь постная» (1621) книгаос.

 

Ньылетӥ люкетын – «Развитие славяно-кириллического письма в XVIII–XX вв.» –Пётр вакытысь азбукаын воштӥськонъёс но 1918 арын воштӥськонъёс сярысь литература возьматэмын луозы ( «Три столетия русского гражданского шрифта» тодос конференциысь ужъёсын бичет; Б. Осипов «Судьбы русского письма» но мк.), озьы ик пичи лыдъем калыкъёслы азбукаослэн кылдэмзы сярысь книгаос (Л. Ившин «Становление и развитие удмуртской графики и орфографии в XVIII – первой половине XIX века», Т. Тепляшина «Памятники удмуртской письменности XVIII века» но мукет). Разделэ озьы ик библиотекалэн йӧскалык фондысьтыз шер пумиськись ужъёс пыртэмын.

 

Ужрадэ шаерысьтымы лулчеберетъя, печатья но ивортодэтъя министерствоысь ӧнерчиос, Удмурт кун университетысь но Удмурт Элькунысь лулчеберет колледжысь дышетӥсьёс, Ӟуч Православной Черклэн Ижкар но Удмурт епархиысьтыз духовенство, газетъёсысь но журналъёсысь ужасьёс пыриськозы.

 

Возьмаськомы вань мылкыд карисьёсты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru