Версия для слабовидящих

Александр Шкляевен творческой пумиськон

Александр Шкляевен творческой пумиськон

12 тулыспалэ 17.00 часын Удмурт кун университетын (1 корп., 229 бӧл.) Удмурт Элькунысь Йӧскалык библиотекалэн «Удмурт шаер» клубезлэн заседаниез ортчем улсын, Александр Шкляевен пумиськон луоз. Ӝыт удмурт литературоведлэн, критиклэн, журналистлэн 70 арес тырмонэзлы сӥземын.

Александр Григорьевич Шкляев (ворд. 1944 арын Якшур-Бодья ёросысь Якшур гуртын) – кылосбур тодосъя доктор, Удмурт Элькунысь тодос удысысь сиё-дано ужась, Удмурт Элькунысь лулчеберет удысысь сиё-дано ужась, Росси Федерациысь Гожъяськисьёслэн огазеяськонзылэн но Журналистъёслэн огазеяськонзылэн ёзчиез, Удмурт Элькунысь Кун премилэн лауреатэз, Вань удмуртъёслэн Кузебай Герд нимо йӧскалык премилэн лауреатэз, «Знак Почета» орденлэн кавалерез.

 

Йылпумъяз МГУ-ысь журналистика факультетэз но аспирантураез. «Комсомолец Удмуртии» газетлэн литсотрудникез луыса, «Молот» журналлэн валтӥсь редакторез луыса ужаз. 1981–84 аръёсы УАССР-ысь Гожъяськисьёслэн огазеяськонэнызы кивалтӥз. 1985–98 аръёсы – Удмурт кун университетысь удмурт но СССР-ысь (РФ) калыкъёслэн литератураоссыя кафедраен. Удмурт кун университетын нимысьтыз журналистика ёзэт, бӧрысь факультэт кылдытонэз малпась луиз, кытын 1999 арысен журналистикалэн историезъя но теориезъя кафедралэн кивалтӥсез луэ.

 

Творческой сюресэз поэт но произак бордысен кутскиз. 1971 арысен литература но критика ӧрын ужанзэ огазея тодослыко но дышетон уженыз. Со луэ «Времена литературы – времена жизни» (1982), «Араны егит муртъёс лыктозы» ( 1986), «Ӵашъем нимъёс» (1995), «Вапумысь вапуме» (2000) эскеронъёслэн но 100-лэсь трос публикациослэн авторзы. Чеберлыко литератураен бичетъёсты но альманахъёсты люкась, книга азькылъёслэн авторзы (соос пушкын Кузебай Гердлэн ужъёсыныз книгаос), учебно-методической юрттэтъёслэн авторзы. Тодмо эпиграммаос, шаржъёс, пародиос, вакчи веросъёс, нылпиослы кылбур гожъясь шуыса.

 

Ужрадэ Удмурт Элькунысь лулчеберетъя , печатья но ивортодэтъя, Удмурт Элькунысь йӧскалык политикая но Удмурт Элькунысь дышетонъя но тодосъя министерствоосысь ужасьёс , Удмурт Элькунысь гожъяськисьёслэн огазеяськонысьтыз ёзчиос, «Удмуртия» книгапоттонниысь ӧнерчиос, Вань удмуртъёслэн «Удмурт кенеш» огазеяськонэз, Удмур кун университетысь дышетӥсьёс, История, кылъя но литературая удмурт институт пыриськоз.

 

Ужрад удмур кылын ортчоз.

 

Возьмаськомы вань мылкыд карисьёсты.

 

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru