Версия для слабовидящих

«Дунне вылысь тужгес но ӟеч муртъёс» книга адӟытон

«Дунне вылысь тужгес но ӟеч муртъёс» книга адӟытон

16-тӥ куарусёнэ 12.00 часэ Киров нимо паркысь фан-зонаын «Бертэм потэ!» гоно фестивалез ортчытон улсын ужалоз «Лучшие люди на свете» («Дунне вылысь тужгес но ӟеч муртъёс») книга адӟытон.

Пуны котьку но адямиен артэ вал. Сюрс аръёс ӵоже адямиен артэ улыса, пуныос дышетскизы адямиез валаны но яратыны – озьы асьсэос адямиос но уг быгато. Пунылэн оскымон эш луэмез пӧртэм калыкъёслэн визькылъёсазы возьматэмын.

 

Адӟытонамы вуыса, бадӟымъёс но нылпиос асьсэлы шедьтозы тунсыко но пайдаё лыдӟиськон, нош пуны вордыны малпасьёс быгатозы ӟечгес дасяськыны юртазы выль эш пыртонлы.

 

Адӟытонлэн нырысетӥ люкетэз тодматоз пуны породаослэн аспӧртэмлыкенызы, соосты будэтон но утён сярысь ивортодэт сётоз. Кин ньыль пыдо эш юртаз вайыны дась ини, солы таӵе книгаос пайда луозы: Н. В. Зубколэн «Воспитание щенка»; В. С. Нехаевлэн «Воспитай себе друга»; М. Кох-Костерзитцлэн «400 советов любителю собак»; Д. Палмерлэн «Ваша собака»; М. Г. Псалмовлэн «Книга собаковода»; Дж. Вулхардлэн, М. Бартлеттлэн «Что должны знать все хорошие собаки» но мукет книгаос. Пӧйшуръёсты яратӥсь муртъёс понна тунсыко луозы «Похитители наших сердец» но «Собаки: очевидное и невероятное» бичетъёс, Ю. П. Голиковлэн «Собачья жизнь» но и Э. Мардерлэн и Д. Хорвицлэн «Собаки» книгаоссы.

 

Адӟытонлэн кыкетӥ люкетаз возьматомы пуныос сярысь тужгес но ӟеч совето но кунгожсьӧр литературной произведениосты. Соос пӧлын А. И. Купринлэн «Белый пудель», Г. Троепольскийлэн «Белый Бим Черное ухо», Дж. Лондонлэн «Белый клык», озьы ик туала изданиос: М. Хэддонлэн «Загадочное ночное убийство собаки», Б. Акунинлэн «Пелагия и белый бульдог» но мукет.

 

Кӧня ке кыл ачиз фестиваль – ӟечкаронлэн праздникез сярысь. Татын ваньзы мылкыд карись муртъёс шутэтскыны но, шулдыръяськыны но быгатозы, волонтеръёслы юрттэт сётыны луоз, нош кыл кутыны быгатӥсь муртъёс – асьсэлы оскымон эш шедьтозы. Фестивале лыктэмъёсты ог 30 пуны возьмалоз. Пуныос город ульчаысь шедьтэмын, соосты адямиен кусып кылдытыны дышетӥзы ини, прививка лэсьтӥзы, соос стерилизовать каремын, соин выль кузё дорын улыны дась.

 

Праздниклэн программаяз: Ижкарысь творческой коллективъёслэн концертсы, кинологъёслэн но ветеринаръёслэн консультациоссы, пӧртэм пумо мастер-классъёс, конкурсъёс но кузьымъёс. Йӧскалык лыдӟетъюртысь ӧнерчиос кагазлэсь пуны лэсьтыны мастер-класс но пуныос сярысь викторина ортчытозы.

 

Ваньзэсты ӧтиськом ӟечкарон ужрадэ пыриськыны. Ижкарысь одӥг гинэ «Кот и Пес» приют понна ӟечкарон пуйы люкалозы (эмъюмъёс, сиён-юон но мукет). Татын «Желтая Бирка»  огазеяськонлы коньдон юрттэт сётыны луоз – кузёостэк кылем пуныосты чылкытатон понна. Нош лотереяе пыриськыса, секыт улон учыре сюрем пуны-коӵышъёслы юрттэт сётыны быгатоды.

 

Сьӧрады паспорт, нылпиостэс но ӟеч мылкыд кутэ! Сӥзьылэз кутскомы ӟечен но эшъяськонэн!