Версия для слабовидящих

«Книга калыклэн ӟуч кылэз» книга адӟытон

«Книга калыклэн ӟуч кылэз» книга адӟытон

6-тӥ-11-тӥ куарусёнэ Эшъяськон юртын, Рош а-Шанаез – еврей Выль арез пусъён ужрадъёсыз ортчытыку, ужалоз Йӧскалык лыдӟетъюртэн дасям «Книга калыклэн ӟуч кылэз» («Русское слово народа Книги») книга адӟытон.

Античность вакытысен еврейёс одӥгысь одӥг гинэ калык вал, кудӥз дышетсконэз но гожтэт тодонэз тужгес но кулэ кариз, со узыръёс понна гинэ ӧй вал. Дышетскемлэн кулэлыкез возьматэмын пословицаосын но поговоркаосын («Кигаез но зарниез уськытӥд ке, нырысь ӝут книгаез» но мукет), азбукалы дышетонын но – нылпи нырысьсэ «тодон-валанлэсь чечызэ» веръякуз («…алеф, мэм но тав букваосты чечыен зырало но нылпилы сое нюлыны сёто, куараез шонер вераз ке»).  

 

Чечылы сӥзем темаез азьланьтыса (еврейёс выль ар ӝӧк вылазы одно ик чечы пукто – чечыен яблок, чечы коврижкаос но мукет), лыдӟетъюртмы Удмурт Элькунысь еврей лулчеберетлэн центреныз Эшъяськон юртын радъям Рош а-Шаналы сӥзем ужрадлы дасяз пичи кузьым – ӟуч литературалы дан ваись авторъёс, кудъёсыз еврей калыкысь потэмын.

 

«Котькуд укное, корказь выжые, / кытын уг но возьмало, уг куро / росси луллэсь улэп мӧльзэ / дуннее еврейёс ваё». Игорь Губерманлэсь та афоризмзэ ми басьтӥм милям экспозицимылы автограф интые. Адӟытонэ пыртэмын Осип Мандельштамлэн но Борис Пастернаклэн, Исаак Бабельлэн но Самуил Маршаклэн, Иосиф Бродскийлэн, Михаил Веллерлэн, Людмила Улицкаялэн книгаосыз (но афоризмез кылдытӥсь аслаз авторлэн книгаосыз – пальпотӥсь но визьмо «гарикъёсыз», кудъёсыз сярысь И. Губерман гожтэ: «Оло, та книгаез лыдӟыны но кулэ ӧвӧл. Но сое одно ик киулын возёно»).

 

Экспозицилэсь бадӟым люкетсэ басьто Дина Рубиналэн книгаосыз – туж тодмо луэм туала прозаиклэн, кудӥзлэсь туэ 19-тӥ куарусёнэ юбилейзэ пусйиськом. Та гожъясь Израиле кошкемез бере Россиысь лыдӟись солэсь книгазэ лыдӟыны луонлыксэ ӧз ышты. Сӥзем Музъем вылын вордскизы авторлэн тужгес но ӟеч книгаосыз: «На солнечной стороне улицы», «Почерк Леонардо», «Синдром Петрушки», «Русская канарейка» трилогия.

 

Иерусалимын улыса, кылбуръёс гожъямысь уг дугды Мускоысь кылбурчи но берыктӥсь, нош али книга поттӥсь Зинаида Палванова (Флор Васильевлэсь кылбуръёссэ берыктӥз, берыктэмъёсыз удмурт кылбурчилэн тужгес но ӟеч бичетъёсаз пыртэмын): адӟытонын возьматэмын луоз «Всё та же тайна» кылбур бичетэз.   

 

«Таланто адями – котькыӵе учырын таланто». Еврей выжыысь немец писательлэн Лион Фейхтвангерлэн кылъёсыз туж ӟеч валэкто паймымон югдурез, куке литературалэсь кыдёкын муртъёс ӟеч кылбурчилы пӧрмытско. Беэр-Шева карысь (Израиль) литературая огазеяськонысь ёзчиослэн кылбур бичетъёссы та малпанэз юнмато.

Яндекс.Метрика

Возник вопрос?

Будем рады вам помочь
Подробнее