Версия для слабовидящих

Т. Г. Владыкина тодосчи-фольклористлэн юбилеезлы сӥзем книга адӟытон

Т. Г. Владыкина тодосчи-фольклористлэн юбилеезлы сӥзем книга адӟытон

Куарусён ӵоже Йоскалык лыдӟетъюртысь Йӧскалык но шаертодон литературая но библиографияя центрын (Удмурт урам, 264-тӥ юрт) ужа «Окрыленная фольклором: к юбилею Т. Г. Владыкиной» адӟытон.

Татьяна Григорьевна Владыкина (вордӥськиз 1953-тӥ арын 8-тӥ куарусёнэ Дэри ёросысь Вуж Кены гуртын) – кылосбур тодосъя доктор, История, кылъя но литературая удмурт институтысь кылосбур эскеронъя ёзэтысь валтӥсь ӧнерчи (1985-тӥ–2000-тӥ аръёсы ёзэтэн кивалтӥсь), Удмурт Элькунысь тодос удысысь дано ужась, Удмурт Элькунысь лулчеберет удысысь дано ужась.

 

Удмурт кун университетысь кылосбур факультетэз быдэстэмез бере (1975) Тарту университетысь аспирантурае (Эстония) пыриз. «Удмурт калык мадиськонъёс» (М., 1980) темая кандидат диссертацизэ, «Удмуртский фольклор: синкретизм и функциональная специфика жанров» (М., 1999) доктор ужзэ утиз. УИИЯЛ-ын ужаны кутскемез бере (1978) удмуртъёслэн вань группаоссы доры ветлыса, фольклор материал люка. Солэн кивалтэмез улсын фольклор тектъёсын корпусэн аналитической уж мынэ.

 

Т. Г. Владыкиналэн пӧртэм тодос ужъёсыз адӟытонэ пыртэмын. Соос возьмато люкась, тодосъя редактор но берыктӥсь сямен ужамзэ.

  • Т. Г. Владыкина –  1980-тӥ арысен отделэн поттэм вань фольклор изданиослэн тодос но кылкутӥсь редакторез луэ. Солэн трос аръёс ӵоже ужам ужезлэн емышез – трос томъем «Удмурт фольклор» серия, «Зарни крезь» серия, со сяна, сериысь 6 выпускез огазеяса, таӵе ик нимен поттэм бичет (2015); Т. Г. Владыкиналэн редакциеныз «Памятники культуры. Фольклорное наследие» серия кутскемын; поттэмын Г. Е. Верещагинлэн 6 томъем люкам сочинениосыз; «Удмуртская обрядовая азбука» сериялы кичӧлтон сётэмын.

  • История, кылъя но литературая удмурт институтын Т. Г. Владыкиналэн «Удмуртский фольклор: проблемы жанровой эволюции и систематики» (1998) но «Ар-год-берган: обряды и праздники удмуртского календаря» (2011) монографиосыз потӥзы.

  • Т. Г. Владыкина Удмурт кун университетэн валче ужа. Кылосбур факультетысь студентъёс понна со дасяз нимысьтыз курсъёс: «Основы мифологии. Мифопоэтика», «Фольклор в культуре народов мира», «Герменевтика фольклорного текста», «Современная фольклористика: методы, направления, школы», «Краеведение».

  • Т. Г. Владыкина – Удмуртиысь школаослы удмурт фольклоръя программаослэн авторзы, кивалтӥз творческой группаен, кудӥз училищеосын, техникумъёсын но школаосысь 9-тӥ–11-тӥ классъёс понна «Краеведение» программая улосвыл компонентэз пыртонъя госстандарт кылдытон бордын ужаз (1999–2000); программаен ужан понна со дасяз шоръёзо школалы удмурт фольклоръя «Ингур» хрестоматия (2004).

  • Т. Г. Владыкинаен кивалтэм улсын 1994-тӥ арысен фольклористикая аспирантура ужа. 10 аспирант филология тодосъя кандидатлэсь степеньзэ басьтӥзы, Ижкарын, Ульяновскын, Кузонын тодос ужзэс утемзы бере.

  • Татьяна Григорьевна – Финн-угор обществолэн (Хельсинки, Финляндия) дано кунгожсьӧр ёзчиез, «Традиционная культура» тодосъя альманахлэн улосвылкуспо оскем муртэз, «Вестник гуманитарного научного образования» (М.), «Вестник Удмуртского университета» но «Ежегодник финно-угорских исследований» (Ижевск) журналъёсысь редколлегиослэн ёзчизы луэ.

 

Экспозицие пыремын Т. Г. Владыкина-Перевозчикова энциклопедиосысь но справочной изданиосысь сярысь биографической материалъёс («Удмуртская Республика», «Ученые-удмурты», «Удмуртские женщины», «Институт: история и современность» но мукет), со сярысь пӧртэм журнал-газетын публикациос.

Яндекс.Метрика

Возник вопрос?

Будем рады вам помочь
Подробнее