Версия для слабовидящих

Владимир Романов кылбурчилэн юбилеезлы книга адӟытон

Владимир Романов кылбурчилэн юбилеезлы книга адӟытон

Гудырикошкон пумозь Йӧскалык но шаертодон литературая но библиографияя центрын (Удмурт урам, 264-тӥ юрт) ужа Владимир Романовлэн вордскемез дырысен 75 ар тырмемезлы сӥзем «“Тол ортчоз но ожо ӝужалоз...” (“Зима пройдет, и прорастет трава...”)» книга адӟытон.

Владимир Васильевич Романов (1943–1989) – журналист, поэт, кылысь кылэ берыктӥсь  – вордскиз Татарстанысь Бавлы ёросысь Удмурт Ташлы гуртын. «Та пичи гуртысь потӥзы куинь эшъёс: Евгений Самсонов (удмурт, писатель), Алексей Афанасьев (чуваш, кылбурчи), Василий Романов (удмурт, кылбурчи, верос гожъясь). Война кутскем бере, эшъёс ӵош фронтэ кошкизы, нош берытскиз кыкез гинэ: Владимирлэн атаез Василий ожмаськонын быриз. Солэн эшез Евгений Самсонов тодмо удмурт прозаик луиз. Владимир Романовлэсь нырысетӥ гожъямъёссэ лыдӟыса, литератураын бадӟым инты басьтоз шуыса валаз. Ӧз янгыша. Романовлэн творчествоез удмурт кылбуретын яркыт усьтӥськиз. Со кема ӧз улы ке но, улонэз азинлыко но бугырес вал» (В. Емельянов).

 

Владимир Романов мӧйыослы но нылпиослы даслэсь трос книга поттӥз. Солэн тужгес но ӟеч кылбур бичетъёсыз пӧлын – «Мынам тулысэ» (1967), «Покчи гужем» (1975; Удмуртиысь Комсомоллэн премиез), «Йырберыктон турын» (1987), «Чебер мако бакчае» (1990; УАССР-лэн кун премиез), «Луд кеч салам» (1984), «Играй с нами» (1971) но мукет. Вань печатлам книгаос адӟытонэ пыртэмын.

 

Владимир Романовлэн кык книгаез – «Поющий узор» (1977) но «Гуслей звонкая струна» (1985) – Мускоысь «Современник» книгапоттониын печатласькизы. Эшшо одӥгез адӟытонэ поттэм бичет печатласькиз 2004-тӥ арын «Память Удмуртии» Элькун программа улсын Йӧскалык библиотекалэн кичӧлтэмезъя. Бичет «Ваёбыж кар = Ласточкино гнездо» нимаське, кылбуръёсыз кык кылын печатламын – ӟуч но удмурт.

 

В. Романов удмурт кылэ берыктӥз А. Пушкинлэсь, В. Маяковскийлэсь, Пабло Нерудалэсь произведениоссэ, тросэзлэсь совето поэтъёслэсь кылбуръёссэ. Поэтлэн произведениосыз берыктэмын Россиысь калыкъёслэн кылазы, печатласькизы элькун изданиосын но кунмылэн шоркараз потӥсь газет-журналын но трос бичетъёсын, чузъяськизы совето радио пыр.

 

«В. Романовлэсь творчествозэ пыӵатӥзы егит кылбурчиос – М. Федотов, В. Шибанов, П. Захаров, В. Ар-Серги, С. Матвеев, Рафита Мин, – гожтэ А. А. Арзамазов “Удмуртская поэзия второй половины 1970 – начала 2010-х годов: человек, природа, город” книгаяз. – Удмурт кылбурет сярысь ке верано, пусйытэк кельтоно ӧвӧл Романовен герӟаськем интертекстэз –этнофутуристъёслэн кылбуръёсаз но прозаяз «азьланьтӥсько», выль сямен лыдӟисько куд-ог мотивъёс, образъёс, идиомаос, интонациос, кудъёсыз нырысь кылдӥзы но азинскизы Владимир Романовлэн кылбуретаз.

 

001   01

 

02   03

Яндекс.Метрика

Возник вопрос?

Будем рады вам помочь
Подробнее