Версия для слабовидящих

«Cемьялэн тусыз книгаысь иллюстрациын» адӟытон

«Cемьялэн тусыз книгаысь иллюстрациын» адӟытон

2-тӥ пӧсьтолэзе Йӧскалык лыдӟетъюртлэн Шер пумиськылӥсь но дуно луись ужкагазъёсын ёзэтаз «Cемьялэн тусыз книгаысь иллюстрациын» адӟытон усьтӥськиз. Со сӥземын Семьялэн но яратонлэн нуналэзлы.

«Вань шудо семьяос огкадесь, котькуд шудтэмез семья ас сяменыз шудтэм луэ», – гожтӥз Л. Н. Толстой одӥгаз романаз. Но ӵошатыны тунсыко, кызьы суредало пӧртэм усточиос одӥг чеберлыко произведениысь кыӵе ке семьялэсь улонзэ.

 

Адӟытон тодматскыны дэмла ӟуч литератураысь тужгес ӟеч произведениослы дасям иллюстрациосын. Тодмо но туж ик тодмо луисьтэм художникъёс соосты суредазы. Книга суредъёсын семья улонлэн пӧртэм дырыз возьматэмын.  

 

Адӟытонэ поттэмын Н. В. Гогольлэн «Тарас Бульба» повестезлэн пӧртэм вакытэ печатлам изданиосыз. Соосты чеберто Е. Кибриклэн, А. Герасимовлэн, Д. Шмариновлэн, А. Костинлэн суредъёсыз. Нош пӧртэм вакытэ улэм суредасьёс кыӵеен адӟизы «Анна Каренина» романысь геройёсты? Тае тодыны луоз, А. Н. Самохваловлэн суредъёсыныз (1953) но Сытинлэн типографияз печатлам М. Щегловлэн, А. Моравовлэн,  А. Коринлэн иллюстрациосыныз чеберъям книгаосты (1914) ӵошатэм бере. «Война и мир» романысь семья возьматэмын Д. Шмариновлэн суредъёсаз. Соосты шедьтыны луоз романлэн 1978-тӥ арын потэм печатлосаз.

 

«Ӟуч улонлэн энциклопедиез» – А. С. Пушкинлэн «Евгений Онегин» романэз дворянъёслэсь улэм-вылэмзэ но возьматэ. Адӟытон тодматоз «Евгений Онегинлы» Л. Тимошенкоен, Н. Кузьминэн, Э. Насибуллинэн, Ю. Игнатьевен, В. Васильевен, О. Коровинэн суредам иллюстрациосын.

 

Озьы ик тунсыко луоз учкыны, кыӵеен адӟо книга суредасьёс Н. Некрасовлэн «Мороз Красный нос» поэмаысьтыз крестьян семьяез. Адӟытонэ поттэм книгаослы суредъёс дасяллям Палехысь Константин но Фаина Мельников кузпалъёс, живописья академик А. А. Пластов.

 

Озьы ик адӟытонысь тунсыко изданиос пӧлы пырозы Кукрыниксаосын чеберъям А. Толстойлэн «Хождение по мукам» романэныз том, А. Бакулевскийлэн но Д. Шмариновлэн иллюстрациосыныз «Белкинлэн повестьёсыз», Г. Н.Бурмагинаен суредам С. Т. Аксаковлэн «Семейная хроника» повестеныз печатлос.

 

Адӟытон ужалоз гудырикошконлэн шорозяз. Ёзэт интыяськемын Пушкин урамысь 200 номеро юртын, Нылпиослы но быдэ вуымтэослы элькун лыдӟетъюртын.

Яндекс.Метрика

Возник вопрос?

Будем рады вам помочь
Подробнее