Версия для слабовидящих

«...Русской Терпсихоры душой исполненный полет» книга адӟытон

«...Русской Терпсихоры душой исполненный полет» книга адӟытон

Инвожо пумозь Йӧскалык лыдӟетъюртысь искусствоя ёзэтын «...Русской Терпсихоры душой исполненный полет» книга адӟытон ужа.

Классической эктонъя ӟуч школа кыксю арлэсь кема возиське. Солэн аспӧртэмлыкез вылӥ ӟечлыкен техникаын но усто хореографиын гинэ ӧвӧл, со лул кужымо луэменыз но герӟаськемын, кудӥз сярысь вакчияк но ӟеч гожтӥз А. С. Пушкин кылбур чураз.

 

Адӟытон мадёз ӟуч балетлэн калык азьын но катанчи сьӧрын улонэз сярысь, корифейёслэсь Анна Павловалэсь, Вацлав Нижинскийлэсь, Майя Плисецкаялэсь, Рудольф Нуреевлэсь, Галина Улановалэсь но мукетъёслэсь тодмо луон но дан басьтон сюрессэс возьматоз. Экспозицие пыртэмын энциклопедиос но справочникъёс («Русский балет», «Русский балет и его звезды»), соос Россиысь эктон искусстволэн историез но туала улонэз сярысь пыр-поч тодон-валан сёто. Озьы ик тодматскыны луэ мемуаръёсын но биографиосын. 

 

Ӟуч балет – асьме странамылэн данъяськонэз. XX  даур возьматӥз балетмылэсь дуннеын вормыса вамышъямзэ, Сергей Дягилевлэн тодмо луэм «Ӟуч сезонъёс» бордысен кутскыса. Адӟытонэ поттэмын туж ӟечлыко печатлос –  «История “Русского балета”, реальная и фантастическая в рисунках, мемуарах и фотографиях из архива Михаила Ларионова» альбом. Отчы пыремын ӟуч суредасьлэн М. Ларионовлэн живописез, графикаез но документъёсыз. Альбоме пырем материалъёс – со суредасьлэн кышноезлэн завещаниезъя Кун Третьяковской галереяе сётэм архивезлэн оглюкетэз но та дырозь музейлэн запасникъёсаз возиськем ужъёс. Книгаен нырысьсэ потэмын С. Дягилевлэн «Ӟуч балетъёслы» но 1920-тӥ–1940-тӥ аръёсысь кунгожсьӧр ӟуч балет группаослы сӥзем витьсюлэсь ятыр туспуктэм, со сяна, рукописьёс, суредъёс, костюмъёслэн но декорациослэн эскизъёссы. 

       

«Михаил Барышников. Я выбрал свою судьбу» – Америкаын тодмо луэм ӟуч эктӥсь М. Барышников сярысь Россиын потэм нырысетӥез книга. Авторез – балетэз туспуктӥсь но критик Нина Аловерт – пыр-поч маде егит эктӥсьлэн Ленинградын улонэз, яратонэз, эшъёсыз но ӵош ужам юлтошъёсыз, улэм-вылэмез, шутэтскемез, Киров театрысь кивалтӥсьёсын но труппаен шугесь кусыпъёсыз но Барышниковлэн Западэ кыльыны мылкыд каремез сярысь, озьы ик Н. Аловерт гожтэ Россиын но Америкаын улонысьтыз мукетъёссэ нимысьтыз пусъёно учыръёс сярысь но.

 

Николай Цискаридзелэн «Мгновения...» книга-автобиографияяз творчествоез сярысь мадёс возьматэ сое Бадӟым театрысь одӥгез яркыт премьерез сямен. Спектакльёсысь чебересь туспуктэмъёс улын – тодмо эктӥсьлэн комментарийёсыз, озьы ик балет критикъёслэн гожъямъёсысьтызы но балетэз азинтӥсь муртъёслэн верамъёсысьтыз басьтэм люкетъёс.

 

«Солисты балета» сериысь книгаосын потэмын Ольга Лепешинскаялэн, Екатерина Максимовалэн, Алла Осипенколэн, Марис Лиепалэн, Николай Фадеечевлэн но мукет таӵе совето усточиослэн биографиоссы.

Яндекс.Метрика

Возник вопрос?

Будем рады вам помочь
Подробнее