Версия для слабовидящих

Удмурт писательлэн А. М. Лаптевлэн 60 арес тырмонэзлы адӟытон

Удмурт писательлэн А. М. Лаптевлэн 60 арес тырмонэзлы адӟытон

Инвожо толэзе Йӧскалык но шаертодон литературая но библиографияя центрын (Удмурт урам, 264-тӥ юрт) ужа «Александр Лаптевлэн визь-лул быртыкъёсыз»  адӟытон. А. М. Лаптев – удмурт гожъяськись, критик, Россиысь но Удмурт Элькунысь гожъяськисьёслэн огазеяськонзылэн ёзчиез, Удмуртиысь сӥё-дано журналист. 

 

Александр Михайлович Лаптев вордскиз 1958-тӥ арын 28-тӥ инвожое Алнаш ёросысь Юртошур-Какси гуртын. УдГУ-ысь кылосбур факультетэз быдэстыса, ужаз «Дась лу!» («Ӟечбур») газетын но «Молот» («Кенеш») журналын, Писательёслэн огазеяськонзылэн пропагандая бюрояз. Литературной кушем нимыз – А. Юртошуров.

 

Адӟытонын возьматэмын писательлэн произведениосыз, кудъёсыз нимысьтыз книгаосын потэмын, озьы ик пыремын «Жингрес куараос» (1975), «Быльырам синкыли» (1997), «Азвесь кышетэн толэзь» (2007) коллективной бичетъёсы.  

 

А. Лаптевлэн веросъёсын но миниатюраосын «Хи-хи» (1997) книгаез лыдӟисьлы ӟеч тодмо. Тужгес но тунсыко «Визь-лул быртыкъёс» глава – авторлэн улон-вылон но кусыпъёс сярысь малпанъёсыз, чакламъёсыз но верамъёсыз. Вераны кулэ, Александр Лаптевлэн авторской куараез шара кылӥське котькуд книгаяз – таин со мукет писательёслэсь висъяське, лыдӟисез бордаз кыске.  

 

А. Лаптевлэн нылпи веросъёсыз пыремын «Чупа-чуп!» (2013) книгае но алигес лыдӟись кие вуэм «Пуньылэн пыдыз потӥз» (2018) веросъёсын бичетэ.   

 

«Тӥ учке ӵемгес ӵукпала» (2008) авторской бичетэ, туала удмурт литература сярысь статьяос сяна, пыризы куамынлэсь ятыр вунэм писательёс сярысь очеркъёс но (Георгий Архипов, Мария Баженова = Льӧм Маня, Евграф Баранов, Николай Васильев...). Талы луыса, книгалэн дуныз эшшо но будӥз.  

 

Адӟытонын тодматскыны луоз эсперанто кылъя дышетон книгаен но (Екатеринбург, 2000), кудзэ А. Лаптев удмурт кылэ берыктӥз.

 

Экспозицие пыро А. М. Лаптев сярысь литературоведческой но биографической статьяос: «Писатели и литературоведы Удмуртии»; У. Бадретдинов «Малпан но дӥсьтон» («Кенеш». 1998. № 9); «Вы чаще смотрите на рассвет!..» (2011. Б-ка «Известия УР». Сер. «Ближние родники») но мукет.

 

collaj

Яндекс.Метрика

Возник вопрос?

Будем рады вам помочь
Подробнее