Версия для слабовидящих

«Данъяськы, Россия! Тон дуннелы Пушкинэз сётӥд!..»

«Данъяськы, Россия! Тон дуннелы Пушкинэз сётӥд!..»

6-тӥ инвожое – Пушкинлэн нуналаз – Йӧскалык лыдӟетъюртысь социогуманитарной но естественнонаучной литературая ёзэтын (Удмурт урам, 199-тӥ юрт) ужаны кутске «Данъяськы, Россия! Тон дуннелы Пушкинэз сётӥд!..» книга адӟытон.

Пушкинлэн гениез быдэс дуннелы валамон но адямиез яратӥсь луэмез ваньзылы ӟеч тодмо ини. Солэсь гожъямъёссэ секытлэсь но секыт ке но берыктыны, дуннелэн котькуд сэрегаз кылбурчилэн лыдӟисьёсыз вань. Та сярысь вера адӟытонэ пуктэм Россиысь кун библиотекалэн фондысьтыз суредъёсын «Всемирный Пушкин» книга каталог. 

 

Печатлосэ пыртэмын книгаос сярысь ог 600 библиографической гожтос, кудӥз возьматэ, А. С. Пушкинлэн ужъёсыз, кунгожсьӧр кылъёсы берыктыса, 1820-тӥ арысен кутскыса, 1990-тӥ аръёсы Россиын, Европаын, Азиын но Америкаын печатласькизы. Тросэз гожтэмъёс вӧзы ватсасько вылкыметъёслэн (обложкаослэн) но титульной листъёслэн репродукциоссы, нош нимысьтыз листъёсын возьматэмын книга графика удысысь тодмо усточиослэн иллюстрациоссы.

 

«Калыкмы понна макем бадӟым шуд сётӥз Пушкинлэн кылдэмез. <...> Кылбурчи калыклэсь асваланзэ юнматӥз. Со вакытэ ик Пушкин гожъяз испанецъёс, итальянцъёс, австриецъёс сярысь, солэн геройёсыз – полякъёс, литовецъёс, чиганъёс, солэн произведениосаз пӧртэм кылын вераськись яркыт дунне курадӟе но яратэ, кылбурчилэн мукет калыкез шӧдыны-валаны быгатэмез нокинэн ӵошатонтэм зол. Сыӵе быгатонлык, оло, дунне литератураын солэн гинэ вал…» (Д. Гранин). Тодмо литературоведлэн А. Долининлэн «Пушкин и Англия»  книгаезлэн валтӥсь сюжетэз – возьматыны, кыӵе англи авторъёсты лыдӟемез Пушкинэз бурдъяз созэ яке мукетсэ произведениез кылдытыны. Пушкинистикаын ӵем поттылэм Шекспирлэн, Байронлэн, Вальтер Скоттлэн нимъёссы сяна, А. Долинин пусъе Дж. Мильтонэз но Дж. Баньянэз, С. Кольриджез но мукет авторъёсты. Пушкинлэсь ассэ писатель сямен возьматон стратегиосыз вылэ англи прецедентъёслэн, источникъёслэн но модельёслэн шӧдӥськемзы эскеремын со литература но лулчеберет ӧрын ик, кудӥз пыр соос Пушкинлэн творчествояз вуизы.  

 

«Пушкин улэп дыръяз ноку но ӧз пота кунгожсьӧры, кытчы со Лицеез быдтэмез бере ик 1817-тӥ арын вуыны дасяське вал. . <...> Льӧль малпанъёсаз – Италие мынон, уйвӧтаз – Франция, со дась вал Африкае ветлыны, малпаське Америка сярысь» (Ю. Дружников). Россия аслэсьтыз нырысетӥ поэтсэ нокытчы потантэм кариз, но солэн творчествоез понна визаос кулэ ӧз луэ. «Памятникын» верамез Пушкин улэп дыръя ик быдэсмиз. Нош «даур ортчыса со, “быдэсак кулымтэ”, кунгожсьӧры сюриз ик <...> но дуннелы возьматӥськиз – “улэпен, будӥсен”» – уллям ӟуч идеология луыса. Та сярысь маде «“В краю чужом...”. Зарубежная Россия и Пушкин» книга. Книгае пырем статьяосын, очеркъёсын, шара верам кылъёсын (кунгожсьӧр библиотекаосысь но архивъёсысь материалъёслэн оглюкетсы нырысьсэ Россиын печатласько) авторъёссы – нырысетӥ эмиграциысь тодмо муртъёс – писательёс, философъёс, Ӟуч Православной Черкысь ужасьёс, суредасьёс, литературоведъёс Пушкин сярысь верало.

 

И. Н. Бочаровалэн но Ю. П. Глушаковалэн «Итальянская Пушкиниана» книгазы Италиын трос аръёс ӵоже Пушкинэн герӟаськем материалъёсты утчамзы сярысь тунсыко мадёс луэ. Авторъёс утчаськиллям кун но нимысьтыз муртъёслэн архивъёсазы, пумиськиллям кунгожсьӧрын улӥсьёсын, кудъёсызлэн ӵыжы-выжыоссы кылбурчиен но эшъёсыныз тодмо вал. Пушкинлы сӥзем темая иконографиен туж узыр материал книгае печатламын; отчы пыремын А. С. Пушкинэн огвакытэ улэм муртъёслэн портретъёссы но.

 

А. С. Пушкинлэсь творчествозэ дунне литературалэн классикез сямен эскерись вылӥын пусъем но мукет печатлам ужъёсын адӟытон ужалоз толэзь пумозь.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru