Версия для слабовидящих

«И. В. Васильев – дышетӥсь, этнограф, югдытӥсь, миссионер» адӟытон

«И. В. Васильев – дышетӥсь, этнограф, югдытӥсь, миссионер» адӟытон

Куартолэзе Йӧскалык но шаертодон литературая но библиографияя центрын (Удмурт урам, 264-тӥ юрт) ужа этнографлэн, югдытӥсьлэн, миссионерлэн И. В. Васильевлэн вордскемез дырысен 160 ар тырмонлы сӥзем книга адӟытон.

Иоанн Васильевич Васильев (1858–1927) священник нылпиосты дышетон понна нимысьтыз тодон-валан басьтэм нырысетӥ удмуртъёс пӧлысь огез луэ. Со вордӥськиз Кузон губерниысь Мамадыш уездысь Юмья гуртын (али Татарстанысь Кукмор ёрос), быдтӥз Кузонысь дышетӥсьёсты дасясь семинариез. Дышетӥсь луыса ужаз Сарапул уездысь Юськинское черкогуртысь начальной калык училищеын. Со вакытэ ик миссионер ужез нуиз, 1881-тӥ арысен штатэ пырисьтэм дьяконлэсь ужзэ быдэсъяз. Нимысьтыз духовной тодон-валан басьтытэк, 1885-тӥ арын иерей санэ пыртэмын но Брангуртэ ыстэмын вал. Собере дышетӥз но служить кариз Мазунино (1890–1893), Пичи Пурга (1893–1908) но Шаркан (1908–1927) черкогуртъёсын. Тодмо, Иоанн Васильев службаоссэ вордскем кылын нуэм, соин гуртоосын чаляк огкыл шедьтыны быгатэм. Дышетон но миссионерской уж сяна, удмуртъёслэн этнографиенызы тунсыкъяськиз. Кузон университетысь Арехологияя, историяя но этнографияя обществолэн ёзчиез вал.  

 

Адӟытонэ поттэмын «Обзор языческих обычаев, суеверий и религии вотяков Вятской и Казанской губерний» (Хельсинхфорс, 1902) но «Обозрение языческих обрядов, суеверий и верований вотяков Казанской и Вятской губерний» (Казань, 1906) монографиосызлэн ксерокопиосыз. 

 

Нырысетӥез пусъем уж, кудзэ печатлазы немец кылын «Memoires de la Societe Fenno-Ougrinne» дано журналын, тодосчиос куспын ӝог тодмо луиз. «Та уж пыр-поч но лэчыт гожтэмын, ӵемысь удмуртъёс но лулчеберетсы шоры сюбег учконъёслы пумит султэ». Книгаын И. Васильев возьматӥз аспӧртэмлыко удмурт фольклорез. Сям-йылолъёс, сэбедъёс но удмуртъёслэн огшоры улоназы ӟечсэ но уродзэ валатонъёс сярысь чакламъёсыз туж дуно луо. Таиз уж пыре Поволжьеысь югдытӥсьёслэн тужгес но усто этнографияя очеркъёссы куспы, кудъёсыз кылдытӥзы но юнматӥзы лыдӟисьёс пӧлын мерлык, история, чеберлык но философия ласянь тодон-валанзэс» (Уваров А. Иоанн Васильев // Писатели и литературоведы Удмуртии. Ижевск, 2006. С. 27–28).

 

Таиз уж пыртэмын на адӟытонэ поттэм «Православные священники об удмуртах» (Ижевск : Удмуртский университет, 2007) электрон печатлосэ, оглюкетэз потӥз «Инмар, вуюись, толэзь но шунды» (Кенеш. 2013. № 4) статьяен.

 

И. В. Васильевлэн биографиез, тодос творчествозэ эскеронъёс пыртэмын справочной изданиосы («Ученые-удмурты», 1997; «Энциклопедия Удмуртской Республики», 2000; «Писатели и литературоведы Удмуртии», 2006), В. Е. Владыкинлэн но Л. С. Христолюбовалэн «История этнографии удмуртов» (1984) книгае, бичетъёсысь статьяосы: В. Ф. Байсаровлэн «Пичи Пурга музъем вылын Иоанн Васильевлэн пытьыосыз» («Историко-педагогический опыт и проблемы разработки учебно-методических изданий в Удмуртии на современном этапе»); Т. Н. Акиловалэн «О служителях Троицкой церкви с. Бураново» («Роль интеллигенции в просвещении удмуртского народа»); А. К. Уваровлэн «К вопросу о становлении жанров удмуртской литературы дооктябрьского периода» («Об истоках удмуртской литературы»); А. Кутявинлэн «Роль Казанской учительской семинарии в подготовке учителей для удмуртских школ в 1872–1918 гг.» («Вопросы истории и культуры Удмуртии»).

Яндекс.Метрика

Возник вопрос?

Будем рады вам помочь
Подробнее