Версия для слабовидящих

«Подвижники православия земли удмуртской» адӟытон ужзэ мытэ

«Подвижники православия земли удмуртской» адӟытон ужзэ мытэ

14-тӥ южтолэзе 16.00 часэ Йӧскалык лыдӟетъюрт Ижевск но Удмурт епархиен валче «Подвижники православия земли удмуртской» адӟытон усьтоз. Со сӥземын Православной книгалэн нуналэзлы. Ужрад ортчоз Ижысь епархилэн управлениезлэн конференц-залаз (Горький ульча, 43 а юрт).

14-тӥ южтолэзе Православной книгалэсь нуналзэ пусъён Россиын сяме пыриз ни. Та нуналэ (выль стилья) 1564-тӥ арын Иван Федоров ӟуч кылын нырысетӥ печатлам «Апостол» книга поттӥз.

 

Православной книгалэн нуналэз бадӟымесь но паськытэсь ужпумъёсты быдэстэ. Туннэ со черклэн сӥё-дано карон нуналэз гинэ уг луы, со ваньмыз понна праздник, кудӥз печатлам кыллы тунсыкъяськонэз будэтон понна радъяське. Но Православной книгалэн нуналэзлэн валтӥсь целез луэ калыклы но книга-газет печатлась огазеяськонъёслы вазиськон: пиналъёсты христиан черклэн куронъёсызъя будэтӥсь, лулэз чылкытатӥсь литературалы саклык висъяны кулэ.

 

«Подвижники православия земли удмуртской» адӟытонлэн темаез сӥземын нырысь ик Трифон Вятский чудотворецлы – Вятской но Пермской епархиослэн сӥё-дано святойзылы. Трифон Вятскийлэн но валче ужасьёсызлэн тыршеменызы Кам шур котырысь музъемъёсы пуксизы нырысетӥ монастырьёс – соос православной миссионеръёслэн форпостъёссы вал, кылсярысь, удмурт музъем вылын. 2018-тӥ арын Вяткаысь чудотворецлы преподобной ним сётэм дырысен 115 ар тырме.

 

Адӟытонлэн нырысетӥ люкетаз («И зазвучало слово Божье») пыремын православной миссионерстволэн историез, туала Удмуртилэн музъемаз христиан осконлэн кылдэмез но азинскемез сярысь материалъёс. Книгаос пӧлысь нырысь ик пусъёно Е. Ф. Шумиловлэсь «Христианство в Удмуртии» книгазэ, кудӥз 2001-тӥ арын потӥз Москва но Ӟуч кунлэн Алексий II Святейший Патриархезлэн но Ижевск но Удмурт архиепископлэн Николайлэн бакель каремезъя, со сяна, адӟытонын возьматэмын та книгалэн 2-тӥ люкетэз – «Православная Удмуртия» книга. Нимысьтыз саклык висъяно Вяткаысь тодмо шаертодосчилэн П. Н. Лупповлэн улэп дыръяз потэм книгаосызлы. Соос сӥземын христиан осконлэн удмурт калык пӧлын вӧлскемезлы но юнмамезлы. Та люкетын ик тодматскыны луоз темалы тупась тодос форумъёслэн но конференциослэн материалъёсынызы.

 

Адӟытонлэн кыкетӥ люкетэз («И лик святой нам душу греет») сӥземын удмурт музъемлэн святойёсызлы – асьме шаерысь нырысетӥ православной миссионеръёслы Трифон Вятскийлы но Стефан Пермскийлы, дун чылкыт мученикъёслы Викторлы (Глазов епископлы) но  Амвросийлы (Сарапул епископлы) но мукет.

 

Удмурт калыкез югдытӥсьёс сярысь материал пуктэмын кунетӥ люкетэ – «Свет Христов просвещает всех». Татчы люкам ужъёс мадё удмуртъёсты дышетон бордын трос тыршем священникъёслэн улэм-вылэмзы сярысь. Куинь югдытӥсьёслэн нимъёссы Сарапул епархилэн канонизацияя списоказ пыртэмын: удмурт кыллэсь нырысетӥ грамматиказэ кылдытӥсь митрополит В. Г. Пуцек-Григорович, протоиерей Михаил Елабужский но иерей Николай Блинов. Адӟытон дыръя возьматозы югдытӥсьёслэсь книгаоссэс, пӧлазы – Н. Н. Блиновлэн ачиз улэп дыръя потэм ужъёсыз.

 

Адӟытонэ лыктэмъёс тодматскыны быгатозы Ижевск но Удмурт епархилэн митрополитэзлэн Викторинлэн аслаз библиотекаысьтыз книгаосыныз. Ужрад дыръя Ижысь епархилэн кивалтэтэзлэн юртаз экскурсия ортчоз, соку книга лавкае пырыса, туала православной литератураен но тодматскыны луоз.

 

Ужрадэз сӥе-дано усьтонэ ӧтемын Ижевск но Удмурт митрополит Викторин, протоиерей Андрей Петров но иерей Максим Санников; Удмурт Элькунлэн Кивалтэтэтэзлэн но Тӧроезлэн Администрациысьтыз внутренней политикая Управлениысьтыз мерлыко огинъёсын кусып возёнъя ёзэтысь кивалтӥсезлэн воштӥсез С. И. Ильинский; Удмурт Элькунысь лулчеберетъя но туризмъя министр В. М. Соловьев; Ижкарысь Администрациезлэн Тӧроезлэн мерлыко политикая кивоштӥсез Д. А. Чистяков; искусствоведение тодосъёсъя кандидат, история тодосъя доктор, Удмурт кун университетысь профессор Е. Ф. Шумилов но мукет куноос.

 

«Подвижники православия земли удмуртской» адӟытон ужалоз 20-тӥ южтолэзёзь. Вань мылкыд карисьёсты ӧтиськом экспозициез учкыны но экскурсие пыриськыны. Группаосты люкаськом, куриськонъёс вуэм бере. Юалляськоно  78-39-53 номеро телефонъя.

Яндекс.Метрика

Возник вопрос?

Будем рады вам помочь
Подробнее