114
Сарапулын ческыт сиёнэз поттыны кутско 19-тӥ даурлэн пумаз. Соку кондитеръёслэн тодмо выжыысьтызы Вильгельм Вольф усьтӥз производствоез но чечымен вузкарись лавкаосты. 1937-тӥ арын южтолэзе кылдытэмын Сарапулысь ческыт сиён поттӥсь фабрика.
Адӟытонэ поттэмын 148 фантик. Выставкае асьсэлэсь люкам кампет кагазъёссэс сётӥзы Ижысь коллекционер Валерий Николаевич Ардышев, Йӧскалык библиотекалэн азьвыл ӧнерчиез Маргарита Владимировна Богомолова но Йӧскалык но шаертодон литературая но библиографияя центрысь библиотекарь Людмила Михайловна Попова. Экспонатъёсты кондитерской фабрика но сётӥз. Валэктӥсь текстъёслы инъет луизы газет-журналысь (Красное Прикамье», «Удмуртская правда», «Советской Удмуртия» газетъёс) но Сарапулысь кондитерской фабрикалэн вотэсбамысьтыз (http://oooskf.ru) публикациос.
Выставка 3 люкетлэсь кылдэмын: «Факты из истории фабрики», «Новый виток развития», «Награды и достижения». Адӟытонэ поттэмын тодмо но яратоно кампетъёслэн фантикъёссы – «Маскарад», «Белочка», «Буревестник», «Ласточка», «Снежок», «Маска», «Ну-ка, отними!».
Нош тодӥськоды-а, «Ну-ка, отними!» кампетлэн историез кутскиз 100 ар талэсь азьло. Нош тодмо фантик – нылэн но пуныен – кылдытэмын 1952-тӥ арын гинэ. Туннэ Сарапульской фабрика поттэ та кампетэз «Ну-ка, угости» нимен.
Вань мылкыд карисьёсты ӧтиськом.
Вуоно арын экспозициез возьматозы пӧртэм интыосын. Ивортэммес возьмалэ!