Версия для слабовидящих

Шер пумиськылӥсь но дуно ужкагазъёсын ёзэтэ вуэм выль книгаос

Шер пумиськылӥсь но дуно ужкагазъёсын ёзэтэ вуэм выль книгаос

Туэ Йӧскалык библиотекаысь шер пумиськылӥсь но дуно ужкагазъёсын ёзэтэ вуизы печатлосъёс (выль но библиотекалэн мукет ёзысьтыз поттэм книгаос). Соосты пыртӥзы «Миниатюрные и малоформатные книги», «Образцы полиграфического искусства книги» но «Книговедение» коллекциосы.

МИНИАТЮРНОЙ НО ПИЧИ ФОРМАТЪЕМ КНИГАОС

  • «Члены Государственной Думы. Четвертый созывъ, 1912–1917 гг.» (М., 2005) – И. Д. Сытинлэн товариществоеныз 1913-тӥ арын печатлам книгалэн репринтэз. Нош со книга (вылтусызъя но материал сётон амалъя) – кисыын нуллон «Nos députés» («Наши депутаты») француз книгалэн копиез луэ. Франциын со паськыт вӧлмемын вал – книгаез справочник выллем кутӥзы, депутатъёслэн ужамзы сярысь газетысь отчетъёсты лыдӟыкузы. Сытинэн печатлам книгалэн аслаз аспӧртэмлыкез, малы ке шуоно со азьвыл вакытысь политикъёслэн биографиенызы тодматэ но партие пыриськемзы сярысь ивортэ. Пуштросэз люкылэмын губерниосъя, депутатъёс но губерниос алфавитъя указателе пыртыса сётэмын. Со сяна, книгаын возьматэмын Думаысь ёзчиослэн пуксён интыоссылэн схемазы, «Зал заседаний Думы» (пушласянь), «Таврический дворец» (педпалыз) суредъёс.

  • Марина Цветаевалэн «О любви» бичетэз поттэмын 2013-тӥ арын «Анигма» издательствоын. Бичет тунсыко луоз чебер книгаез но кылбуретэз дунъясь муртъёслы.

  • Николай Васильевич Гогольлэн цитатаосыз, лэчыт кылъёсыз люкаса поттэмын «Афоризмы»  печатлосын (М., 2017). Отчы пыртэмын 85 карта, карталэн дэремаз печатламын Н. В. Гогольлэн музейысьтыз туспуктэмъёс но иллюстрациос.


КНИГА ПЕЧАТЛАН ИСКУССТВО

  • «АСТ» книгапоттониын печатлам М. Булгаковлэн «Мастер но Маргарита» романэз (М., 2017) потӥз «Коллекционная книга» сериын. Книга тунсыко Надя Рушева суредасьлэн иллюстрациосыныз. «Вакчи улонэз куспын Надя суредаз 12 000 котыр иллюстрациос, Александр Пушкинлэсь, Лев Толстойлэсь произведениоссэ улэпъяса. «Мастер но Маргарита» романлы суредам иллюстрациосыз берпуметӥ ужез луиз. «Мастер но Маргарита» понна Надя нырысетӥ суредась» – иворто лыдӟисьлы книга поттӥсьёс. «Мон суредъёсме азьлогес адӟисько… Соос кагаз вылэ пото водяной знакъёс выллем, мыным нош соосты маин ке тодмостыны гинэ кыле на», – гожтӥз Надя Рушева аслаз суредамез сярысь.
  • Книга печатлан искусствоез возьматэ «Светские манеры» печатлос (люказ Т. Г. Тетенькина; суредаз В. Ковалев. Калининград : Янтарный сказ, 2005). Солэн вылтусыз синмез кыске: зарнивуам обрез, ляссе, графика амалэн кылдытэм иллюстрациос. Книгалэн пуштросэз но тунсыко: серемпыр, капчи но вольыт кылын со тодматэ пӧртэм вакытъёсы калык азьын астэ чебер возён амалъёсын но туала этикетэн, пайда кенешъёс дэмла.

КНИГОВЕДЕНИЕ

  • Книговедение удысын тыршись ӧнерчиослы, дышетӥсьёслы но тодосчиослы пайда луоз «“В России надо жить по книге”. Начальное обучение чтению и письму. Становление учебной книги в XVI–XIX вв.» (М., 2015) бичет. Тодос статьяослэн авторъёссы эскеро Россиысь лыдӟыны дышетонъя книгаослэсь историзэс. Нырысетӥ валэктӥсь ужъёс бордысен кутскыса, Константин Ушинскийлэн дышетон книгаосыз борды дугдо. Та бичетэз эшшо но тунсыкогес каро пыртэм библиографияя указательёс. Библиография возьматэ, макем узыр луэ дышетскон книгаосты печатлан история.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru