Версия для слабовидящих

Йӧскалык библиотекалэн лыдӟиськон кунокуаез тулыспалэ

Йӧскалык библиотекалэн лыдӟиськон кунокуаез тулыспалэ

27-тӥ тулыспалэ 16.00 часэ Эшъяськон юртын (Орджоникидзе урам, 33а) Йӧскалык библиотека лыдӟиськон кунокуа ортчытэ. Отчы лыктозы куноос – бигер кылбурчиослэн клубазы ветлӥсьёс но Удмуртиысь писательёслэн огазеяськонзылэн ӟуч секциысьтыз ёзчиосыз. 

Бигер кылбурчиослэн клубзы (кивалтӥсез – Голфия Исхакова Татарстанысь но Удмуртиысь писательёслэн огазеяськонзылэн ёзчиез) кылдӥз 1990-тӥ аръёсы, куке «Янарыш» элькун газет потыны кутскиз. Сое кылдытӥсьёс пӧлын – Ибрагим Нафиков ( кушемнимыз Ибрагим Биектаулы), кылбурчи, публицист но азьветлӥсь. Бигер газетэ гожъяськисьёслэсь ичи луэмзэс валаса, со егит но кутскись авторъёс понна нимысьтыз кружок радъяз. Кружокысь журналистъёс, писательёс, кылбурчиос потӥзы. 1997-тӥ арын газетлэн редакциез Йӧскалык политикая министерстволэн юрттэмезъя Удмуртиын улӥсь бигер кылбурчиослэн но крезьгурчиослэн кылбуръёсынызы но кырӟанъёсынызы «Зов судеб» бичет поттӥз. 

 

Берло кык арзэ Удмуртиысь писательёслэн огазеяськонзылэн ӟуч секцилэн ёзчиосыз (кивалтӥсез – Наталья Сурнина) «Возьмемся за руки, друзья» проектэз азинтӥзы. Со проект улсын кылбурчиосын пумиськонъёс ортчизы Можга, Сарапул, Воткинск, Глазов, Камбарка карын, Алнаш, Шаркан, Сёлта, Киясово, Каракулино селоын, Пермь улосвылысь  Чайковский но  Башкортостанысь Нефтекамск карын. Пумиськонлэн мугез – Писательёслэн огазеяськонэн но интыосысь гожъяськись адямиосын кусып кылдытон но юнматон, «Луч» журналын соослэсь ужъёссэс поттон. 

 

Йӧскалык библиотека кемалась ӟеч кусып тупатӥз Удмуртиысь писательёслэн огазеяськонзылэн ӟуч секциеныз. Йӧскалык библиотекалэн лыдӟиськон кунокуаяз ӵемысь ортчыло секцилэн ёзчиосыныз пумиськонъёс. 2011-тӥ арын лыдӟиськон кунокуаын «Луч» журналлэн 20 ар тырмонэзлы сӥзем ужрад ортчиз. Ужрадын журналлэсь вылтуссэ кылдытӥсь суредасьлэн Михаил Вахринлэн ужъёсыныз адӟытон возьматӥзы вал.  

 

Йӧскалык юртлэн крезьгуръя салоназ пумиськонэз нуоз И. Н. Курс, Йӧскалык библиотекалэн лыдӟиськонъя центреныз кивалтӥсь. Ӝытын кылбуръёссэс лыдӟозы Ольга Денисова, Илья Марков, Валерий Килеев, Татьяна Дмитриева, Павел Манохин, Денис Садыков, Иван Малов. Бигер кылбурчиос лыдӟозы асьсэ кылбуръёссэс но ӟуч кылэ берыктэмъёссэс. Татьяна Шайхутдинова П. И. Чайковскийлэсь романсъёссэ быдэстоз. 

 

Вань мылкыд карисьёсты ӧтиськом.

Пыронэз дунтэк.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru