Версия для слабовидящих

Йӧскалык лыдӟиськоннилэн литературалы сӥзем куно бӧлетаз «Алисалэн йырпорымон чай юонэз»

Йӧскалык лыдӟиськоннилэн литературалы сӥзем куно бӧлетаз «Алисалэн йырпорымон чай юонэз»

Йӧскалык лыдӟиськоннилэн литературалы сӥзем куно бӧлетаз «Алисалэн йырпорымон чай юонэз» ортчоз. Льюис Кэрроллэн вордскемез дырысен 185 ар тырмонлы сӥзем ӝыт радъяськоз 27-тӥ толшоре 18.00 часэ Wonderland творческой кофейняын (Пушкинской урам, 216-тӥ юрт). 

Дуннеын «Приключения Алисы в стране чудес» но «Алиса в Зазеркалье» книгаосты яратӥсьёс миллионлэсь ятыр. Соос ӟеч тодо Льюис Кэрролл писательлэсь нимзэ (Чарльз Лютвидж Доджсон англи математиклэн, кылбурчилэн но проза гожъясьлэн псевдонимез). Алиса сярысь повестьёс абсурд жанрез азинтӥсь произведениос радэ пыремын. Авторлэсь маскара верамъёссэ валан понна математикаез, лингвистикаез но философиез тодоно. 

 

1879-тӥ арын Л. Кэрроллэн книгаез нырысьсэ ӟуч кылын потӥз «Соня в царстве дива» нимын, авторез но берыктӥсез пусъемын ӧй вал. Собере эшшо кӧня ке изданиос печатласькизы, нош революцилэсь азьвыл поттэмъёс пӧлын берпуметӥез (1913-тӥ ар котырын) берыктэм уж нимаськиз «Алиса в волшебной стране». Со «Зарни пичи дыр» журналлэн приложенияз – «Англи выжыкылъёс» бичетын потӥз. Берыктӥсен лыдъяло Михаил Чеховез. 1920-тӥ–1940-тӥ аръёсы эшшо кӧня ке берыктэмъёс печатласькизы на. Соос пӧлысь пусъёно Владимир Набоковлэсь вариантсэ. Со 1923-тӥ арын потӥз «Аня в стране чудес» нимын. Ужзэ В. Набоков печатлаз В. Сирин псевдоним улсын.

 

Тужгес но ӟеч берыктэмъёс пӧлы пыре Нина Демурова литературоведлэн ужез. Н. Демурова кутӥз писатель улэп дыръя печатласькем берпуметӥ книгаез но М. Гарднерлэсь «Аннотированная Алиса» комментарийёсын ужзэ. Демуровалэн книгаезлы кылбуръёс берыктӥзы Самуил Маршак, Дина Орловская, Ольга Седакова. 

 

Лыдӟисьёс яратӥзы Борис Заходерлэсь ужзэ но. Яратоно книгазэ ӟуч кылэ берыктэмезлэсь азьвыл Б. Заходер англи оригиналзэ 25 ар чӧже кутскыса лыдӟылэм.

 

Льюис Кэрроллэн гожтэмез весь бурдъяськытэ творчествоен вырисьёсты. «Алисаез» али но берыкто, ужъёс печате сюро, Интернетэ пото.

 

«Алисалэн йырпорымон чай юоназ» лыктэм куноос тодматскозы аслаз авторлэн талантъёсыныз, асьсэлэсь но быгатонлыкъёссэс возьматозы. Ӝыт ӵоже куноос логикаез кулэ карись задачаослы валэктон утчалозы, кыл шудонэ пыриськозы. Туспуксьыны яратӥсьёслы (нялтас вераса, Чарльз Доджсон туж умой туспуктӥсь вал) сэлфи-сэрег дасямын луоз. Сэлфи-сэрегын Л. Кэрроллэн книгаезлэн пӧртэм аръёсы поттэм изданиосыз пӧлын куноос фотое пуксьыны быгатозы «Алисалэн» геройёсызлы пӧрмытскыса.

 

Пыронэз дунтэк.

Вань мылкыд карисьёсты ӧтиськом!

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru