Версия для слабовидящих

The Beatles группалэн Дунневыл нуналэзлы сӥзем ӝыт

The Beatles группалэн Дунневыл нуналэзлы сӥзем ӝыт

25-тӥ толшоре 19.00 часын Йӧскалык лыдӟиськонни Ижысь Beatles-клубен валче крезьгуро ӝыт ортчытэ. Ужрад сӥземын Beatles группалэн Дунневыл нуналэзлы – ЮНЕСКО огазеяськонлэн юнматэмезъя, та нуналэз 2001-тӥ арысен 16-тӥ толшоре пусъё. 

Ӝытэ Beatles-лэсь крезьгурзэ шудозы Ижысь крезьгурчиос. Нош группалэсь шер чузъяськись кырӟанъёссэ быдэстозы Йӧскалык библиотекаын возиськись нотаен бичетъёсъя. 

 

Библиотекалэн искусствоя ёзэтаз англи группалэн творчествоезлы сӥзем трос ужъёсты утьыса возё. Нырысь ик пусъёно тужгес но тодмо «The Beatles-лэн антологиез» книгаез (2002). Та зэмзэ но бадӟым книга (секталаезъя 5 килограмм) группалэн улон сюресэз сярысь тужгес но пыр-поч гожтэм ужен лыдъяське. Отчы пыризы интервьюос, «битлъёслэн» архивазы возиськем фотоос – тросэз соос нырысьсэ та книгаын печатласькизы. 

 

1963-тӥ–1970-тӥ аръёсы потэм Beatles-лэн вань альбомъёсыз (13 альбомысь 176 кырӟанъёс) пыремын «The Beatles. All albums»  куать тетраден комплектэ – со нимысьтыз фортепианолы нотаосын но гитаралы аккордъёсын, текстъёсын бичет.

 

Фанатъёс понна тужгес но дуно Beatles-лэн грампластинкаосыз. Библиотекаын вань «Резинка лул» (Rubber Soul) но «Битлз» (The Beatles) альбомъёс – соос поттэмын Коля Васинлэсь, Россиысь тужгес но тодмо битломанлэсь, коллекцизэ кутыса.

 

Ӝыт кутскон азьын куноос тодматскозы Йӧскалык лыдӟиськонниысь но Beatles-клубен люкам книгаосын, нотаосын, грампластинкаосын. Ӝыт йылпумъяськоз караоке-баттлэн.


 

Ужрад ортчоз «ВМясо» стрит-кафеын ( К. Маркс урам, 206-тӥ юрт).

 

Вань мылкыд карисьёсты ӧтиськом. (+18)

 

Пыронэз дунтэк.

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru