Версия для слабовидящих

В. Г. Пантелеева литературатодосчиен пумиськон

В. Г. Пантелеева литературатодосчиен пумиськон

25-тӥ коньывуонэ 17 часэ Удмурт Элькунысь йӧскалык библиотекалэн йӧскалык но шаертодон литературая но библиографияя ёзэтаз «Тӧро сэрег» сузьет улсын литературатодосчиен, журналистэн но гожъяськисен В. Г. Пантелееваен пумиськон ортчоз.

Вера Григорьевна Пантелеева Дэри ёросысь Вуж Мартьян гуртын вордскиз. Шор ёзо школаез витьёсын йылпумъяса, Урал Кун университетысь журналистика факультетэ заочно амалэн дышетскыны пыриз но «Ленинец» ёрос газетын корреспондент луыса ужаз. Куинетӥ курс бере, УрГУ-ысь кошкыса, А. М. Горький нимо Литературной институтын дышетсконзэ азьланьтӥз. 1991-тӥ арысен – Удмурт Кун университетысь удмурт литературая но Россиысь калыкъёслэн литературазыя кафедраын ассистент. Россиысь тодосъёсъя Академиысь Дунне литературая институтысь аспирантураез йылпумъяз но 1999-тӥ арын татын ик «Национально-семантические особенности стиля Флора Васильева (сопоставительный анализ оригинала и перевода)» темая кандидат диссертацизэ утиз. Али дыре – УдГУ-ысь удмурт кылтодосъя, финн-угор дуннеез дышетонъя но журналистикая институтын журналистика кафедраын доцент, школаослы литературая программаослэн, учебникъёслэн, хрестоматиослэн авторзы, студентъёслы кылтодосъя дышетскон юрттэтъёслэн авторзы. В. Г. Пантелева тужгес трос выре удмурт литературалэн но публицистикалэн семантика но стиль ласянь аспӧртэмлыксэс эскерыса, художественной кылысь кылэ берыктонлэн ужпумъёссэ сэрттэ-пертче, йӧскалык школаосын литератураез дышетон амалъёсты умоятон бордын ужа, трос кылъем дышетон вӧлметлэн ужамзэ эскере. Та ужпумъёсъя ог 90 статья поттӥз но «Поэтический мир Флора Васильева» монография гожтӥз. Со сяна, Вера Григорьевна Кузебай Герд но Лидия Нянькина сярысь потэм телевизионной документальной коноослэн авторзы.

 

Удмурт Элькунысь йӧскалык библиотекаын пумиськон В. Г. Пантелевалы 50 арес тырмонэзлы сӥземын. Вераськонлы мукетыз муг – 2016-тӥ арын кык книгаез потӥз: «Удмуртская поэзия и перевод: анализы, интерпретации, комментарии» тодос издание но Вероника Дор кушем нимын поттэм «Триптих» веросъёсын, улонысь учыръёсын, кылбуръёсын бичет.

 

«Тӧро сэрег» сузьет улсын ортчись ужрадъёс лякыт, эшъяськон мылкыдын, тунсыко юан-веранъёсын ортчыны чакламын. В. Г. Пантелееваен пумиськонэ журналистъёс, УдГУ-ысь дышетӥсьёс, магистратураын дышетскисьёс, «Удмуртия» книгапоттонниысь ужасьёс ӧтемын.

 

Ужрад удмурт кылын мыноз.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru