Версия для слабовидящих

«Неотчуждаемая ценность: коллекции Национальной библиотеки УР» адӟытонэз усьтон

«Неотчуждаемая ценность: коллекции Национальной библиотеки УР» адӟытонэз усьтон

24-тӥ куартолэзе 16 часэ Удмурт Элькунысь йӧскалык лыдӟиськонниын (Удмуртская ур., 264) Славян гожъяськонлэн но культуралэн нуналэзлы сӥзем «Неотчуждаемая ценность: коллекции Национальной библиотеки УР» адӟытон усьтӥськоз

Адӟытонэ Удмурт Элькунысь йӧскалык библиотекалэн шер пумиськись но дуно документъёсын ёзэтысь тужгес но дуноесь коллекциосысь изданиос пыртэмын, озьы ик нимысьтыз изданиос (азьло Россиысь но Удмуртиысь тодмо адямиослэн асъетысьтызы), кудъёсты рос-прос эскерыса вуонояз выль коллекциосы пыртылозы.

 

Адӟытонлэн нырысетӥ люкетаз – «От книги рукописной к книге печатной» – киын гожтэм книгаос пыризы (берло киын гожтэм книгаос, кудъёсты книга печатланлэн паськыт вӧлмемез бере гожтӥзы), «Отечественные книги кирилловской печати XVII – нач. XX в.» но «Старопечатные книги гражданской печати XVIII в. – 1830 гг.» коллекциосысь книгаос.


«По владельческим книжным собраниям» нимо кыкетӥ люкетэз «Первоначальный фонд НБ УР» коллекциысь книгаос усьтозы, татчы XIX–ХХ-тӥ аръёсысь 600-лэсь трос изданиос пыризы, соос пӧлын волостьысь калык лыдӟиськонниослэн, 20-лэсь трос общественной но дышетскон лыдӟиськонниослэн фондысьтызы, озьы ик 1918-тӥ арын огазеям частной бичетъёсысь книгаос. Удмуртиысь лулчеберетэз эскеронын тунсыко луэ универсальной темая (книгаос, туспуктэмъёс, открыткаос) «Коллекция Осиповых-Югриных», кытчы Сарапул карысь тодмо вузкарчилэн Н. И. Осиповлэн бичетысьтыз книгаос пыризы. Та коллекцилэн ог люкетэз адӟытонлэн кыкетӥ люкетаз пыроз. Собере мынозы Император Александр нимо лицейлэн (азьло Царскосельской лицей) библиотекаысьтыз книгаос, йылпумъялозы экспозициез та дыре нокыӵе коллекцие огазеямтэ Удмуртиысь но Россиысь пӧртэм книга бичетъёсысь изданиос (личной но дышетскон библиотекаосысь, калык лыдӟиськонниосысь, пӧртэм огазеяськонъёслэн библиотекаосысьтызы), кудъёсты Совето вакытэ возьматъялляны ӧз лэзьялэ.

 

«Краеведческие редкости» нимо куинетӥ люкет «Краеведческая книга» (XIX–XX-тӥ дауръёсысь тужгес тунсыкоесь шаермылэн историезъя изданиос, удмурт тодосчиослэн но югдытӥсьёслэн ужъёссы) но «Краевая книга» (XIX-тӥ даурысен Удмуртиын потэм книгаос) коллекциосысь изданиосын тодматоз. Удмурт кылъя книгаос пӧлын луозы тодмо удмурт тодосчиослэн но гожъяськисьёслэн улэп дыръязы потэм изданиос (куд-огъёсыз автографъёсын), со сяна суредъёсын нылпиослы но мӧйыослы азбукаос, нотаосын кырӟан бичетъёс. Адӟытонэз узырмытозы Ижын потэм миниатюрной изданиос (тужгес вужез – А. С. Пушкинлэн 1946-тӥ арын удмурт кылын потэм «Сказка о рыбаке и рыбке»; «Анигма» книгапоттоннилэн изданиосыз но мук.).

 

Адӟытонэз ортчытон улсын таӵе ужрадъёс радъямын луозы:

  • 25-тӥ куартолэзе 16 часэ – «Удмуртская книжность: зарождение и развитие» лекция (лыдӟе Ю. В. Семенов, философия наукаосъя кандидат, Удмурт Элькунысь лулчеберет удысысь дано ужась, «Русский Лад» Всероссийской созидательной движенилэн Удмурт ёзэтлэн азьмуртэз);
  • 26-тӥ куартолэзе 16 часэ – миниатюрной книга лэсьтонъя мастер-класс (нуисез – Н. М. Аглямутдинов, «Анигма» предприятилэн кивалтӥсез, миниатюрной книгаосты люкась).


Возьмаськомы вань мылкыд карисьёсты.

 

Юанъёсъя татчы вазиськоно: (3412) 78-39-53, rbook@unatlib.org.ru.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru