Версия для слабовидящих

Лыдӟы киноез Библиоӝытэ!

Лыдӟы киноез Библиоӝытэ!

22-тӥ оштолэзе Удмурт Элькунысь йӧскалык лыдӟиськонниын котькуд ар ортчись «Библионочь» нимо социально-культурной акция улсын пӧртэм ужрадъёс радъяськозы. Таяз аре акция Россиысь кинолэн арезлы сӥзьыса «Читай кино!» девизэн ортчоз.

Россиын нырысетӥез Библиоӝыт 2012-тӥ арын 20–21-тӥ оштолэзе ортчиз (та дыр 23-тӥ оштолэзе пусйиськись Книгалэн но авторской праволэн дунневыл нуналзэ лыдэ басьтыса быръемын вал). Лыдӟиськонэз данъясь акция умой возьматэ, кызьы удысужлыко огазеяськонъёс ваче кариськыса ас ужзы шоры быдэс ёзвыжылэсь (поколенилэсь) учконзэс воштыны быгато. Лыдӟиськисьёсын выль ужан амалъёсты быдэс дуннеысь лыдӟиськонниос уже куто, Россиын гинэ «Библионочь» проектэ быдэс кунысь сюосын, собере сюрсъёсын лулчеберет ужъюртъёс пыриськизы. Ужрадлэн валтӥсь ужпумез – ваньзылы возьматыны, библиотека огшоры адямиослэсь но пӧртэм огазеяськонъёслэсь малпанъёссэс быдэстыны но лыдӟиськон, лулчеберет, дышетскон, лул ӝикытлык (нравственность) но шаерез гажан дунлыкъёс вылын ӵош ужаны дась шуыса.

 

Удмурт Элькунысь йӧскалык библиотекаын «Библионочь-2016» куинь интыын радъяськоз.

 

17.30 часэ техника но гурт хозяйство литературая ёзэтын (30 лет Победы ур., 14) «Играем в детектив» акция ортчоз. Вань ужрадъёс англи детектив сериалъёсын но англи сямъёсын герӟаськозы. Куноосты миссис Хадсон пумиталоз но англи чаен куноятоз. Детектив люкетэз разминкаен кутскоз, «Убитый в библиотеке» квестэн азьланьтӥськоз но англи детектив романъёсъя викторинаен йылпумъяськоз. Шудонэ пыриськисьёс туспуксьыны быгатозы (XX-тӥ даурлэн нырысетӥ аръёсысь англи дӥсьёсты мертаса), вашкала детектив книгаез выльдонъя мастер-классэ пыриськыны, ас киынызы дневник лэсьтыны но мультфильм дасяны дышетскозы.

 

18 часэ В. А. Журавлев нимо УдГУ-ысь учебно-научной лыдӟиськонниын (Ломоносов ур., 4 б) «Кинограни» акция кутскоз, солы сӥзьыса Йӧскалык библиотека «17 мгновений весны» сюжет дасяз (Юлиан Семеновлэн тодмо книгаез но соя кылдытэм трос сериё кино вылэ пыкиськыса). Акцие пыриськисьёс Elefant кафее но пыраны, Берн карысь Сяськаё урамтӥ но калгыны, ватэм фотолабораториын туспуксьыны, шифр малпан комнатае но пыраны, зэмос разведчиклы кулэ луись син сазез кыдатӥсь мнемотренажерез но адӟыны быгатозы.

 

16.45 часэ азьло архивлэн юртаз (Удмуртская ур., 264) «Весна на Удмуртской улице» кутскоз. Возьмаськомы вань киноез яратӥсьёсты но тодӥсьёсты, кино лэсьтӥсьёсты но сценарий гожъясьёсты. Ужрадлэн программаез: Лев Вахитов режиссёрлэсь киноосэ учкон но соя викторина ортчытон; Светлана Стасенко режиссёрен онлайн-пумиськон – «Карамболина» киноез учкон но соя вераськон; «Биб-ЛЕО-Оскар» премиез сётъян; театральной грим лэсьтонъя мастер-класс; книгаосъя лэсьтэм киноослы трейлеръёсты уже кутыса ӟуч но кунгожсьӧр кылъёсын лыдӟиськонъя ӵошатскон. Визьмоосызлы – Михаил Эстринэн «Азбука кино» медиашудон.

 

Лыктэ ваньды – тунсыко луоз!

 

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru