Версия для слабовидящих

Алишер Навоилэн 575 арес тырмонэзлы сӥзем литература ӝыт

Алишер Навоилэн 575 арес тырмонэзлы сӥзем литература ӝыт

17-тӥ тулыспалэ 16 часэ Удмурт Элькунысь йӧскалык библиотека быдэс дуннелы тодмо, узбек классика литературалэн азьмынӥсезлэн Алишер Навоилэн 575 арес тырмонэзлы сӥзем «Вкус восточной мудрости» литературной  ӝыт ортчытэ («Удмуртия мультикультурная» ужрадъёсын сузьет улсын).

Шор дауръёсысь дышетӥсьлэн, гуманистлэн, Ӵукпалысь  кун удысчилэн Низамаддин Мир Алишер Навоилэн (1441–1501) асьме дорозь вуэм кылёсбурез туж узыр но пӧртэм пумо. 30 пала кылбуръёсын но поэмаосын, кылпӧросъёсын, тодослыко трактатъёсын бичет, соос пӧлын тужгес но устоез ужез – «Хамса» («Пятерица»), кудаз 5 эпической поэма пыре: «Смятение праведных», «Лейли и Меджнун», «Фархад и Ширин», «Семь планет», «Искандарова стена». Туннэ нуналъёсы Навоилэн творчествоез Узбекистанысь туала дышетскон сӧзнэтэ пыртэмын, элькунысь валтӥсез – Йӧскалык библиотеказы солэсь нимзэ нуллэ.

 

Ӝыт ортчоз шундыӝужанпал чай юон сямъя, озьы ужрадэ пыриськисьёс Ӵукпаллэн йылолъёсыныз но лулчеберетэныз матынгес тодматскыны быгатозы. Куноос киын буям пиалаосысь зэмос самарканд чай юозы но шунды ӝужан палась ческыт сиёнъёсты оскалтозы, кудъёсын ужрадэз ортчытыны юрттӥсь Удмурт Элькунысь «Мерлыко юрттонъя но лулчеберетэз азинтонъя “Азия Плюс” узбек йӧскалык центр» мер огазеяськонлэн ёзчиосыз куноятозы. Таӵе ӵукпал шӧмо атмосфераын быдӟым кылбурчилэн пӧртэм кылъёсын чузъяськись чуръёсыз выль сямен кылӥськозы.

 

Алишер Навои  но солэн узбек лулчеберетэз азинтон ужын кельтэм пытьыез сярысь «Азия Плюс» Центрлэн азьмуртэз Мухутдин Пайзидинович Бахридинов вералоз, кылбуръёссэ лыдӟоз но литератураын кылёсбурез сярысь вералоз кылосбур тодосъёсъя кандидат Алексей Андреевич Арзамазов.

 

Ӝытын Удмурт Элькунысь йӧскалык библиотекалэн фондысьтыз книгаосын «Возлюбленный сердец» адӟытон ужалоз. Отчы пырозы Навоилэн ужъёсыз – поэмаосыз, рубайёсын бичетъёсыз, соос пӧлын удмурт кылэ берыктэмъёсыз но, со сяна Навоилэн творчествоаз шӧдскымон пытьы кельтэм быдӟым перс кылбурчиослэн – Омар Хайамлэн, Фирдоусилэн, Физулилэн, Джамилэн, Румилэн, Хафиз Ширазилэн, Низами Гянджевилэн, Рудакилэн, Саадилэн но мукетъёсызлэн – ужъёссы. Адӟытонэз «Персидские миниатюры XIV–XVII веков» но «Индийские миниатюры XVI–XVIII веков» альбомъёс узырмытозы.

 

Ужрад таӵе адресъя ортчоз: Гуманитарной но инженерной технологиосъя Кам институт (В. Сивкова ур., 12 а, 214 бӧл.)

 

Возьмаськомы вань мылкыд карисьёсты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru