Версия для слабовидящих

В. М. Ванюшевлэн 80 арес тырмонэзлы

В. М. Ванюшевлэн 80 арес тырмонэзлы

10-тӥ тулыспалэ Удмурт Элькунысь йӧскалык библиотекалэн Йӧскалык но шаертодон литературая но библиография ёзэтаз «Аръёсын ваче син»: М. В. Ванюшевлэн 80 арес тырмонэзлы» адӟытон усьтӥське.

Василий Михайлович Ванюшев – удмурт кылбурчи но литературатодосчи, Росси Федерациысь гожъяськисьёслэн огазеяськонзылэн ёзчиез, кылосбур тодосъёсъя доктор, Удмурт Элькунысь лулчеберет удысысь дано ужась, Удмурт Элькунысь тодос удысысь дано ужась, Удмуртиысь Кун премилэн лауреатэз, Чуваш Элькунысь И. Я. Яковлев нимо йӧскалык премилэн лауреатэз, Дружба орденлэн кавалерез.

 

Адӟытон Удмуртиысь йӧскалык лулчеберетэз азинтонын трос лэсьтэм дано адямилэн пӧртэм пумо творчествоеныз тодматоз. Тодослыко ужъёсыз пӧлын – удмурт литературалы сӥзем нырысетӥ монографиез – «Расцвет и сближение» (1980), «Вершины корнями сильны» (1987) статьяосын бичетэз, «Творческое наследие Г. Е. Верещагина в контексте национальных литератур Урало-Поволжья» (1995) книгаез, кудӥз понна автор Удмурт Элькунысь Кун премиеныз пусъемын но кылосбур тодосъёсъя доктор луиз.

 

Василий Ванюшевлэн литературая ужъёсызлэн валтӥсь темаосыз вошъяськытэк кылё: удмурт шаерез яратон, вакытъёслэн но выжыослэн исторической герӟетсы, пӧртэм калыкъёслэн эшъяськонзы. Кылбур творчествоеныз тодматон «Выжыосы» (1976) нимо нырысетӥ книгаысеныз кутске, кудаз пыремын «Иван но Марья» тодмо балладаез. Авторлэн пӧртэм жанръёсын (поэма, кылбур, баллада, рондель, акростих, акросонет, триолет, романс, сӥзён) ужаны быгатонэз «Аръёсын ваче син» (1995), «Яратӥсько адямиез яратыны» (2015) бичетъёсын возьматэмын. Василий Ванюшев озьы ик нылпиос понна гожъя – экспозицие «Вить чиньы – одӥг кикур» (1982) книга но «Меми гожтэт» (2006) поэма пыртэмын.

 

В. Ванюшевлэн творчествоез пӧртэм кылъёсы берыктылэмын: адӟытонын тодматскыны луэ ӟуч кылэ берыктэм «Колосок, задевший небо» бичетэныз, удмурт, француз, ӟуч кылъёсын потэм «Удмурт Выжы Книга (Иднакарын) = Le livre des racines des Oudmourtes (Sur Idnacar) = Как будто Книга Бытия (На Иднакаре)» поэмаеныз, чуваш кылын «Салам, Шупашкар!» кылбуръёсын но веросъёсын сборникен. Василий Ванюшев ачиз но венгер, финн, француз, коми, чуваш, литва но ӟуч кылъёсын гожъяськись авторъёслэсь кылбуръёссэс берыктылӥз. Кылсярысь, адӟытонын Михаил Худяков этнографлэн «Песнь об удмуртских батырах» ужезлэн удмурт кылэ берыктэмез возьматэмын, кудӥз 2004-тӥ арын потэм «Дорвыжы» нимын потӥз.

 

Адӟытон 29-тӥ тулыпалозь ужалоз таӵе адресъя: Удмурт ул., 264.

 

Возьмаськомы вань мылкыд карисьёсты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru