Версия для слабовидящих

А. М. Корепановлэн «Сибирский тракт: дорога в достойную жизнь» книгаезлэн презентациез

А. М. Корепановлэн «Сибирский тракт: дорога в достойную жизнь» книгаезлэн презентациез

15-тӥ толсуре 17 часын «Удмурт шаер» клублэн заседанияз А. М. Корепановлэн «Сибирский тракт: дорога в достойную жизнь» книгаеныз тодматскон ортчоз. Ужрадэз Удмурт Элькунысь йӧскалык лыдӟиськонниысь Йӧскалык но шаертодон литературая но библиография центр Ижкарысь кун эмтодос академиен ӵош радъяло.

Анатолий Максимович Корепанов – эмтодосъя доктор, профессор, Россиысь сӥё-дано врач, Удмурт Элькунысь тазалыкез утёнысь сӥё-дано ужась, Удмурт Элькунысь кун премилэн лауреатэз, Ижкарысь кун эмтодос академилэн сӥё-дано академикез, Тодосъёсъя Нью-Йоркысь академилэн действительной ёзчиез.

 

А. М. Корепановлэн тодослыко эскеронъёсыз – гастроэнтерология но пульмонология удысъёсысь ужпумъёс. Со 200-лэсь трос тодослыко ужъёслэн но 5 тодослыко изобретениослэн авторзы. Кылсярысь, солэн кивалтэмез улсын «Увинской» муиз вулэн бурмытӥсь ӟечлыкез эскеремын. Академиклэн тодослыко эскеронъёсызлэн йылпумъянъёсыз СНГ-ысь трос йӧнатон ужъюртъёсын кутӥсько. Со эмтодосъёсъя 20 кандидат но 3 доктор дасяз.

 

«Сибирский тракт: дорога в достойную жизнь» кузьмадёсаз А. М. Корепанов аслаз семьяез, фельдшерысен тодослыко школалэн кивалтӥсез дорозь будэмез но Ф. Ф. Янцен, А. Я. Губергриц, Б. Д. Боревская, В. Ф. Машагатов, Т. М. Макарова, Г. Е. Данилов но мукет дышетӥсьёсыз сярысь вера.

 

Ужрадэ Удмурт Элькунысь Кун Кенешын, Лулчеберетъя но туризмъя министерствоын, Дышетонъя но тодосъя министерствоын, Тазалыкез утёнъя министерствоын ужасьёс, Ижкарысь кун эмтодос академиысь но Удмурт кун университетысь дышетӥсьёс, Нырысетӥ элькун больницаысь врачъёс, профессорлэн ужъюлтошъёсыз но дышетскисьёсыз пыриськозы. А. М. Корепановлэн тодмо нунокеныз – Москваысь филармонилэн солисткаеныз, Удмуртиысь сӥё-дано артистэн, пианисткаен Ася Корепановаен видео пыр герӟаськон радъяськоз.

 

Презентацилы «Прикосновение к судьбам: о жизни и творчестве А. М. Корепанова» адӟытон дасямын. «По дороге к свету знаний» люкетын врачлэн, тодосчилэн, дышетӥсьлэн А. М. Корепановлэн улон сюресэз сярысь энциклопедической но справочной изданиос, шаертодон бичетъёс, периодикаысь статьяос возьматӥськозы (Л. С. Христолюбова «Ученые-удмурты»; «Старые Зятцы»; «Удмурт кизилиос», «Вклад ученых Удмуртии в науку России»; «Моя партийная работа»); «От научной идеи к клинической практике» люкет А. М. Корепановлэн тодослыко ужъёсыныз (монографиосын, дышетскон пособиосын, бичетъёсысь но газет-журналъёсысь статьяосын) но солэн кивалтэмез улсын гожтэм кандидат диссертациослэн авторефератъёсынызы тодматоз.

 

Ужрад Удмурт кун филармонилэн конференц-залаз ортчоз (Пушкинская ул., 245).

 

Возьмаськомы вань мылкыд карисьёсты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru