Версия для слабовидящих

«Колыбельные песни в диалоге культур» хрестоматилэн презентациез

«Колыбельные песни в диалоге культур» хрестоматилэн презентациез

27-тӥ коньывуонэ 17 часын Удмурт Элькунысь йӧскалык лыдӟиськонни Калыкъёслэн эшъяськон юртазы (Орджоникидзе ульча, 33 а) «Колыбельные песни в диалоге культур» хрестоматилы презентация ортчытэ.

Изданилэн кылдытӥсез – педагогика тодосъёсъя кандидат, Удмурт Элькунысь дышетонэз азинтонъя институтысь удмурт кылосбуръя но йӧскалык кылъёсъя кафедралэн доцентэз Роза Аркадьевна Кузнецова. Авторлэн тодослыко тунсыкъяськонъёсыз – трос кылъем но пӧртэм лулчеберето Удмурт Элькунын йӧскалык удмурт кылэз дышетонлэн аспӧртэмлыкъёсыз.

 

«Колыбельные песни в диалоге культур» хрестоматие удмурт но ӟуч калык но авторской (соос пӧлын ик кылбурчиосын гожтэмъёсыз), озьы ик куд-ог финн-угор калыкъёслэн (венгер, финн, карел, эстон, мордва, пор но мк.) кылосысьтызы нуны веттан кырӟанъёс пыризы.

 

«Дуннеысь вань калыкъёслэн нуны веттан кырӟанъёсазы огкадез вань. Озьы ке но, кырӟанъёсын калыклэн философиезлэн но улон шоры учконэзлэн пӧртэмлыкез шӧдӥське», – гожтэ Р. А. Кузнецова изданилэн азькылаз, кытын нуны веттан кырӟанъёслэн аспӧртэмлыкъёссы но сюжетъёссы эскерисько, нуны веттан кырӟанъёс пыр покчи пиналъёсыз пӧртэм лулчеберетэн тодматонлы саклык висъяське.

 

Удмурт Элькунысь крезьгурчиослэн огазеяськонзылэн кивалтӥсез Марина Германовна Ходырева но кылосбур тодосъёсъя доктор Татьяна Григорьевна Владыкина хрестоматиен тодматозы. Р. А. Кузнецовалэн ужез сярысь малпанъёссэс вералозы элькунысь вузъёсысь дышетӥсьёс, академической исследовательской институтысь тодослыко ужасьёс.

 

Ужрадын нуны веттан кырӟанъёсты профессиональной солистъёс но крезьгуро коллективъёс быдэстозы, соос пӧлын эстрадной кырӟанъёсъя «Знакомые мелодии» студия, Крезьгуро колледжысь фольклорной ансамбль «Сорока» но мукетъёсыз. Калыкъёслэн эшъяськон юртсылэн фойеаз Удмурт Элькунысь йӧскалык лыдӟиськоннилэн фондысьтыз книгаосын «Колыбельная в контексте народной песни» адӟытон радъямын луоз, кудаз ӟуч но финн-угор калык кылосысь бичетъёс, артэ улӥсь калыкъёслэн кылосъёссылэн ог-огенызы герӟаськемзы сярысь эскеронъёс возьматӥськозы.

 

Ужрадэ пыриськозы Удмурт Элькунысь лулчеберетъя но туризмъя министерствоын, Йӧскалык политикая министерствоын, Дышетонъя но тодосъя министерствоын ужасьёс, Удмурт Элькунысь гожъяськисьёслэн но крезьгурчиослэн огазеяськонъёссылэн, национально-культурной огазеяськонъёслэн ёзчиоссы, лулчеберет удысын ужасьёс, дышетскисьёс.

 

Возьмаськомы вань мылкыд карисьёсты.

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru