Версия для слабовидящих

Гай Сабитовлэн 100 арес тырмонэзлы сӥзем конференция

Гай Сабитовлэн 100 арес тырмонэзлы сӥзем конференция

15–16 куарусёнэ удмурт кылбурчилэн Гайфутдин (Гай) Сабитович Сабитовлэн 100 арес тырмонэзлы сӥзем «Я жизнь пою...» нимын научно-практической конференция ортчоз.

Конференциез радъясьёс – Росси Федерациысь дышетонъя но тодосъя министерство, Удмурт Элькунысь лулчеберетъя но туризмъя министерство, Удмурт Элькунысь йӧскалык политикая министерство, Удмурт кун университет, История, кылъя но литературая удмурт институт, Удмурт Элькунысь йӧскалык библиотека, Кукмор муниципал ёрослэн Быдэсъясь комитетэзлэн Лулчеберетъя кивалтэтэз.

 

Гай Сабитович Сабитов – удмурт кылбурчи, УАССР-ысь лулчеберет удысысь сӥё-дано ужась, УАССР-ысь Кун премилэн лауреатэз. Вордскиз Выль Канисар (али Татарстанысь Кукмор ёрос) гуртын. Удмурт пединститутысь кылосбуръя факультетэз но М. Горький нимо литературая институтэз йылпумъяз. Ужаз Удмурт радиоын диктор, бӧрысь – литературно-драматической передачаослэн редакторзы луыса. Гай Сабитов – удмурт но ӟуч кылын кылбур бичетъёслэн авторзы. А. С. Пушкинлэсь, Янка Купалалэсь, Г. Тукайлэсь, М. Джалильлэсь но мукетъёслэсь кылбуръёссэс удмурт кылэ берыктылӥз.

 

Гай Сабитовез «сю кырӟанъёслэн кылбурчизы» нимало. Солэн кылъёсызъя трос тодмо кырӟанъёс гожтэмын: «Шулдыр ӝыт», «Паймод ява», «Тупаса улон понна» но мукет; Удмуртиысь каръёслы но каргуртъёслы сӥзем кырӟанъёс («Можга», «Сарапул», «Балезино»).

 

15-тӥ куарусёнэ В. А. Журавлёв нимо учебно-научной библиотекаын (Ломоносов ульчаын, 4 б юрт) конференциез усьтон луоз. Со нуналэ пленарной но секционной заседаниос ортчозы, Г. Сабитовлэсь кылбуръёссэ чеберлыко берыктонъя мастер-класс радъямын луоз.

 

16-тӥ куарусёнэ Удмур Элькунысь йӧскалык библиотекаысь «Удмурт шаер» клублэн Гай Сабитовлэн вордскем палъёсаз, Кукморын, пумиськонэз ортчоз. Ёросысь Лулчеберетъя юртын пленарной заседание ортчоз. Школаын дышетскисьёс пӧлын Кукмор ЦБС-эн радъям вожвылъяськонын вормисьёс Гай Сабитовлэсь кылбуръёссэ лыдӟозы. Ужрадын «“Я жизнь пою...”: к 100-летию со дня рождения Г. С. Сабитова» книга адӟытон возьматӥськоз, кудӥз кык ёзэтлэсь кылдэмын: «“...И чуть добрее делаю планету”: литературное творчество Г. С. Сабитова» но «“Слава добрых дел”: жизнь и литературная деятельность Г. С. Сабитова».

 

Ужрадэ пыриськозы Удмурт Элькунысь йӧскалык политикая но Лулчеберетъя но туризмъя министерствоосын ужасьёс, История, кылъя но литературая удмурт институтысь тодосчиос, Удмурт кун университетысь но шор дышетон заведениосысь дышетӥсьёс, библиотекарьёс, озьы ик Россиысь мукет регионъёсысь (Санкт-Петербургысь, Татарстанысь, Башкортостанысь, Мордовиысь, Марий Элысь), Эстониысь, Венгриысь но Тунисысь адямиос.

 

                                                                                                Конференцилэн программаез

 

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru