Версия для слабовидящих

Вань дауръёсысь но вань калыкъёслэн тужгес ӟеч романзылы – 400 ар

Вань дауръёсысь но вань калыкъёслэн тужгес ӟеч романзылы – 400 ар

Гудырикошкон пумозь Удмурт Элькунысь йӧскалык библиотекалэн лыдӟиськисьёсын ужанъя ёзэтаз Мигель де Сервантес Сааведралэн «Хитроумный идальго Дон Кихот Ламанчский» книгаезлэн потэмез дырысен 400 ар тырмонлы сӥзем адӟытон ужа.

2002-тӥ арын Нобелевский институтэн кылдытэм жюри, кудаз 54 кунысь 100 тодмо гожъяськисьёс пыро, «Дон Кихот» романэз адямивыжылэн историяз тужгес ӟечен лыдъяз. Озьы Сервантеслэн книгаез «Быдэс дуннеысь литература» нимо100-томъем библиотекалы списокез йыръяз.

 

«Дон Кихотлэн» росси изданиез «Быдэс дуннеысь литературалэн библиотекаезлэн» 37 но 38-тӥ томъёсаз потӥз (200-томъем книга сузьет, кудъёсыз СССР-ын «Художественная литература» издательствоын 1967–1977 аръёсы потӥзы). Кыказ ик томе тодмо литературатодосчилэн но кылысь кылэ берыктӥсьлэн Ф. В. Кельинлэн бадӟым статьяез пыремын. Испан кылысь Н. Любимовен но Ю. Корнеевен берыктэм романэз француз живописецлэн но гравёрлэн Гюстав Дорелэн иллюстрациосыз узырмыто. Кызьы тодмо Дорелэн биографиысьтыз, со романэз пыр-поч эскериз, Испаниен кема тодматскиз, аслэсьтыз адӟемъёссэ альбомаз суредаса.

 

Адӟытонын озьы ик Сервантеслэн улон сюресэзлы, романэз гожтон историлы сӥзем литературатодос эскеронъёс (А. О. Цомакион «Сервантес: его жизнь и литературная деятельность», А. Вебер «Мигель де Сервантес Сааведра (1547–1616)», Э. И. Выгодская «Алжирский пленник: необыкновенные приключения испанского солдата Сервантеса, автора “Дон-Кихота”» но мукет) возьматэмын.

 

Тунсыко «Судьбы книг» сузьетын потэм В. Е. Багнолэн «Дорогами “Дон Кихота”» ужез, кудаз романэз гожтон малпанлэн сюресэз, солэн рыцарской традициен герӟаськемез эскериське, Сервантеслэн «Дон Кихотэз» но Авельянедалэн «Дон Кихотэз» ӵошатӥсько, романэз мукет кылъёсы берыктонлэн историез возьматӥське (соос пӧлын ик Смоллет, Флориан, Тик, Жуковский но мукет гожъяськисьёсын берыктэмъёс).

 

Саклык висъямон Владимир Набоковлэн «Лекции о “Дон Кихоте”» книгаез (кудӥз гожтэмын Гарвардской университетын тулыс семестрын 1951/1952-тӥ дышетскон арын лыдӟон понна).

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru