Версия для слабовидящих

«Удмурт дунне» энциклопедической справочниклэн презентациез

«Удмурт дунне» энциклопедической справочниклэн презентациез

10-тӥ инвожое 17.00 часын Удмурт Элькунысь йоскалык библиотека «Удмурт дунне» элькун газетлэн редакциеныз ӵош Быдэс Россиысь финн-угор прессалэн VII фестивалез улсын периодической изданилэн 100 арес тырмонэзлы луыса дасям «Удмурт дунне» энциклопедической справочниклэсь презентацизэ ортчытэ.

 

1915 арын 4 тулыспалэ удмурт кылын «Войнаысь ивор» газетлэн нырысетӥ номерез потӥз. Берло аръёсы газет «Удморт», «Виль Cин», «Гудыри», «Удмурт коммуна», «Удмурт правда», «Советской Удмуртия» нимъёсын потӥз, 1992 арысен – «Удмурт дунне». Газетлэн валтӥсь редакторъёсыз вал: П. П. Глезденев, В. Д. Крылов, К. С. Яковлев, Т. К. Борисов, П. Н. Баграшов, Д. И. Корепанов, С. М. Бурбуров, И. Т. Ворончихин, М. И. Волков, А. С. Бутолин, П. М. Яшин, В. М. Михайлов, А. Е. Комаров, А. П. Петров но мк.; 2010 арысен – З. К. Рябинина.

 

Газетын элькунысь общественно-политической но лулчеберет улон сярысь, экономика, гурт улосвыл, дышетон, мерлык но йӧксалык политика сярысь гожъяло. 2015 арын удмурт лулчеберетэз утемез, улӟытэмез но азьланьтэмез понна Вань удмуртъёслэн Кузебай Герд нимо йӧскалык премизэ басьтӥз.

 

Удмурт кылын «Удмурт дунне» энциклопедической справочникез газетлэн редакциез дасяз (дасясьёс Л. Я. Малых, В. С. Уразаева, З. К. Рябинина) но поттыны коньдонэн М. А. Кастрен нимо огазеяськон (Финляндия) юрттӥз. Печатлос «Историысь чуръёс» люкет бордысен усьтӥське, кытчы газетлэн кылдэмез но азинскемез сярысь 1915 арысен туннэ нуналозь статьяос пыризы. Справочнике «Удмурт дуннеын» ужась валтӥсь редакторъёслэн, корреспондентъёслэн но внешатной авторъёслэн улон-вылонзы сярысь сведениос пыремын (ваньмыз 1735 ним). Энциклопедия пӧртэм аръёсысь трос туспуктэмъёсын узырмытэмын.

 

Ужрадэ Удмурт Элькунысь лулчеберетъя но туризмъя министерствоысь, Дышетонъя но тодосъя министерствоысь, Йӧскалык политикая министерствоысь, Печатья но массовой коммуникациосъя агентствоысь ужасьёс, Журналистъёслэн огазеяськонысьтызы ёзчиосыз, История, кылъя но литературая удмурт институтысь ӧнерчиос, Удмурт кун университетысь журналистика факультетысь дышетӥсьёс, со сяна Россилэн мукет улосвылъёсысьтыз (Татарстанысь, Перм улосвылосысь, Мордовиысь, Марий Элысь, Ханты-Мансийск автоном округысь) но Эстониысь журналистъёс но официальной адямиос вуозы.

 

Презентациын Йоскалык библиотекаын ужасьёсын дасям «“Удмурт дунне”: 100 лет в диалоге с читателем» нимо книга адӟытон ужалоз. Нырысетӥ люкетаз газетлэн кылдэмез, пыд йылэ султэмез но солэн азинскемез сярысь ужъёс люкамын, кыкетӥяз ¬– газет материалъёс вылын лэсьтэм обзорной но эскерон статьяос бичамын.

 

Ужрад Калыкъёслэн эшъяськон юртаз Орджоникидзе ур., 33а адресъя ортчоз.

 

Возьмаськомы вань мылкыд карисьесты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru