Версия для слабовидящих

Ашальчи Окилэн «Та буртчин чуръёсыд = Эти шелковые строчки» книгаезлэн презентациез

Ашальчи Окилэн «Та буртчин чуръёсыд = Эти шелковые строчки» книгаезлэн презентациез

24-тӥ оштолэзе 17 часын Удмурт Элькунысь лыдӟиськоннилэн шаертодонъя но финн-угор литературая ёзэтаз (Удмуртская урам, 264-тӥ юрт) Ашальчи Окилэн «Та буртчин чуръёсыд = Эти шелковые строчки» книгаезлэн презентациез ортчоз. Бичетэз 2011-тӥ арлэн пумаз «Удмуртия» книгапоттонни печатлаз.

Акилина Григорьевна Векшина, калык пӧлын со тодмо Ашальчи Оки псевдонимен (1898–1973), – нырысетӥ удмурт кылбурчи но гожъяськись. Вордӥськиз Елабуга уездысь Кузёбай гуртын (туннэ Удмурт Элькунысь Грак ёрос), крестьян семьяын. Карлыганысь дышетӥсьёсты дасясь семинариез йылпумъяса, Акилина Григорьевна 16 аресысен дышетӥсь луыса ужаз. 1919-тӥ арын Кузон университетысь рабфаке дышетскыны пыриз, собере – эмъян факультетэ. Дышетсконзэ йылпумъяз 1927-тӥ арын, син эмъясь врач луиз. Ашальчи Окилэн нырысетӥ кылбуръёсыз но веросъёсыз печатласькизы 1918-тӥ арын «Виль синь» но «Гудыри» газетъёсын. 1928-тӥ арын дуннеез адӟизы солэн «Сюрес дурын» но «О чем поет вотячка» нырысетӥ кылбур бичетъёсыз. 1933-тӥ арын кылбурчи национализм ужпумъя юнме шорысь янгыше уськытэмын вал. Со дырысен Ашальчи Оки творчестволэсь палэнтӥськиз. Война аръёсы фронтын хирург луыса тыршиз, геройлыко ужамез понна данъян пусъёсыз вань.

 

«Та буртчин чуръёсыд = Эти шелковые строчки» бичетэз дасязы кылбурчи, Россиысь писательёслэн огазеяськонзылэн ёзчиез, Лидия Степановна Нянькина но Ашальчи Окилэн музей-юртаз ужась Мария Степановна Петрова. Книгаын люкамын А. Г. Векшиналэн удмурт но ӟуч кылын кылбуръёсыз но веросъёсыз, Акилина Григорьевна сярысь тодмоосызлэн но ӵыжы-выжыосызлэн тодэ ваёнъёссы.

 

Презентациын ужалоз Ашальчи Окилы сӥзем адӟытон. Солэн нырысетӥ люкетаз бичамын кылбурчилэн пӧртэм кылъёсын печатламъёсыз. Кыкетӥ ёзэтын люкамын А. Г. Векшиналэн улэмез но ужамез сярысь бичетъёс, соос пӧлын А. А. Ермолаевлэн, З. А. Богомоловалэн, В. М. Ванюшевлэн А. Г. Шкляевлэн, П. Домокошлэн ужъёссы.

 

Презентацие пыриськозы Удмурт Элькунысь йӧскалык политикая министерствоысь ӧнерчиос, Россиысь но Удмуртиысь писательёслэн огазеяськонысьтызы ёзчиос, Удмурт кун университетысь дышетӥсьёс, «Удмуртия» книгапоттонниын ужасьёс.

 

Возьмаськомы вань мылкыд карисьёсты.

Система Orphus Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru