Версия для слабовидящих

А. Г. Шкляевлэн «Арысь аре» книгаезлэн презентациез

А. Г. Шкляевлэн «Арысь аре» книгаезлэн презентациез

 

26-тӥ толшоре 17.00 часын Йӧскалык но шаертодон литературая но библиографияя центрын (Удмуртская урам, 264-тӥ юрт) «Удмурт шаер» клублэн заседанияз критиклэн но литературоведлэн А. Г. Шкляевлэн «Арысь аре» книгаеныз тодматскон ортчоз.

Удмурт Элькунысь тодос удысысь сиё-дано ужась, Росси Федерациысь гожъяськисьёслэн огазеяськонзылэн но журналистъёслэн огазеяськонзылэн ёзчиез Александр Григорьевич Шкляев кылем арлэн кутсконаз аслэсьтыз 70 арес тырмонзэ пусйиз. Солы луыса Удмурт кун университетын «Удмурт шаер» клублэн заседаниез ортчиз. Со ӝытэ котькудӥз вераськоназ пусйиз солэсь паймоно кадь ужась луэмзэ но удмурт литератураез яратэмзэ: «Со котьку выль но туала. Солэн эскеронъёсаз огшоры текст анализ гинэ ӧвӧл, нош улон пыр ортчон но со сярысь сюлмаськон но удмурт литератураез пумтэм-йылтэм яратон», – сыӵе кылъёс веразы А. Г. Шкляев сярысь ӵош ужан эшъёсыз – удмурт филологи факультетысь дышетӥсьёс.

 

Тани А. Г. Шкляевлэн «Арысь аре. Удмурт литература даурлэн кожъёсаз» нимо выль книгаез потӥз, кудӥз М. А. Кастрен нимо обществолэн юрттэмезъя печатласькиз. Бичетэ гожъяськисьёс но критикъёс сярысь статьяос, диалогъёс, очеркъёс, портретъёс, рецензиос, тодэ ваёнъёс (Г. Верещагин, К. Герд, А. Ермолаев, В. Романов, В. Широбоков, Э. Батуев но трос мукет. сярысь) пыризы. Книгаын озьы ик удмурт литературае пытьы кельтэм тодмо удмурт, финн-угор но ӟуч гожъяськисьёсъя, литературоведъёсъя но критикъёсъя биобиблиографической список вань.

 

Презентациын озьы ик Александр Григорьевич Шкляевлэн улэмез но творчествоез сярысь видеоролик возьматозы (Удмурт кун университетысь журналистика факультетэз кемалась гинэ ӧвӧл йылпумъям студентка А. Курбанова). Солэн литературоведение удысын эскерон ужъёсыз сярысь вералозы  соин ӵош ужась тодосчиос. В. М. Ванюшев, В. К. Кельмаков но мукетъёс.

 

Пумиськонэ Вань удмуртъёслэн «Удмурт кенеш» огазеяськонлэн ёзчиосыз, Удмурт Элькунысь гожъяськисьёслэн огазеяськонлэн ёзчиосыз, Удмурт кун университетысь дышетӥсьёс, Историяя, кылъя но литературая удмурт институтысь, удмурт Элькунысь йӧскалык дышетонъя научно-исследовательской институтысь, Дышетӥсьёслэсь тодон-валанзэс будэтонъя институтысь ужасьёс пыриськозы.

 

Презентациын «Удмурт литература тодосчилэн синмыныз» книга адӟытон ужалоз. Нырысетӥ люкетысь изданиос Александр Григорьевич Шкляевлэсь творческой палзэ усьтозы («Удмуртская Республика» энциклопедия, 2008; Л. С. Христолюбова «Ученые-удмурты», 1997; А. М. Лаптев «Тӥучке ӵемгес ӵукпала...» / «Вы чаще смотрите на рассвет», 2008; З. А. Богомолова «Голоса эпохи», 2003 но А. Г. Шкляевлэн мукет литературно-критической ужъёсыз). Кыкетӥ люкетэ удмурт гожъяськисьёслэн но критикъёслэн ужъёссы пырозы, кудъёссэ А. Г. Шкляев аслаз «Арысь аре» выль книгаяз эскере (К. Митрей «Секыт зӥбет» ; А. Клабуков «Тютю Макси»; Г. Красильников «Арлэн кутсконэз» ; А. Перевозчиков «Йырчукин»; Г. Романова «Ӝужыт-ӝужыт гурезе»; С. Матвеев «Чорыглэсь лушкам кылбуранъёс» ; М. Атаманов «Ньыль зарезь пыр – Иерусалиме»; А. Бутолинлэн, М. Горбушинлэн, А. Ермолаевалэн, П. Поздеевлэн но мукетъёслэн статьяоссы).

 

Ужрад удмурт кылын ортчоз.

 

Возьмаськомы вань мылкыд карисьесты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru