Версия для слабовидящих

Гожъяськисен Вениамин Ившинэн творческой пумиськон

Гожъяськисен Вениамин Ившинэн творческой пумиськон

7-тӥ шуркынмонэ 16 часын Удмурт Элькунысь йӧскалык лыдӟиськонниысь шаертодонъя но финн-угор литературая ёзэтаз (Удмуртская урам, 264-тӥ юрт) «Удмурт шаер» клублэн заседаниез ортчем улсын гожъяськисен Вениамин Никонорович Ившинэн творческой пумиськон луоз, кудӥз солэн 65 арес тырмонэзлы сӥземын.

В. Н. Ившин – удмурт кылбурчи, публицист, кылысь кылэ берыктӥсь, «Удмуртия» книгапоттоннилэн валтӥсь редакторез (1994 арысен), Удмурт Элькунысь но Росси Федерациысь лулчеберет удысын сӥё-дано ужась, Удмурт Элькунысь Кун премилэн лауреатэз («Удмуртская Республика» энциклопедия понна, 2001). В. Н. Ившинлэн нырысетӥ кылбуръёсыз 1966 арын «Советской Удмуртия» газетын печатламын вал. 1976 арын нырысетӥ «Мар дуно» нимо кылбур бичетэз потӥз, мукет аръёсы – «Инбаммы одӥг» (1980), «Выжъёс» (1983), «Котыртӥ-котыртӥ» (1993) кылбур бичетъёсыз; «Шур сьӧрысь бӧдёно» (1990), «Шуланэ мынам дас вить» (1995) нылпиослы книгаосыз.

 

В. Н. Ившин А. С. Пушкинлэсь, Н. А. Некрасовлэсь, С. А. Есенинлэсь, О. А. Поскребышевлэсь но мукет гожъяськисьёслэсь ужъёссэс удмурт кылэ берыктэменыз тодмо. А. С. Пушкинлэн 200 арес тырмонэзлы сӥзьыса, кылбурчи «Поп сярысь но солэн визьтэм ляльчиез сярысь выжыкылзэ» удмурт кылэ берыктӥз, кудӥз кык кылъем изданиен потӥз. Таиз книга Москва Кивалтэтлэн радъям ӵошатсконаз «Ӟуч классикаез тужгес умой берыктон» номинациын преми басьтӥз.

 

Творческой пумиськонын ужалоз «Писатель и издатель: отклики не посторонних» книга адӟытон. Солэн нырысетӥ люкетэз – «Во всем многообразии жанров» – тодматоз Вениамин Ившинлэн чеберлыко ужъёсыныз (кудъёсыз пӧлын повестьёсыз, веросъёсыз, кылбур бичетъёсыз, пиналъёслы произведениосыз, журнал-газетъёсын потэм ужъёсыз). Кыкетӥ люкетаз - «Жизнь и творчество писателя» – В. Н. Ившинлэн улэмез но ужамез сярысь литературно-критической статьяос пыртэмын (А. А. Ермолаевлэн, З. А. Богомоловалэн но мукет критикъёслэн ужъёссы).

 

Ужрадэ пыриськозы шаерысьтымы Лулчеберетъя, печатья но ивортодэтъя но Йӧскалык политикая министерствоосысь ӧнерчиос, Вань удмуртъёслэн «Удмурт кенеш» огазеяськонысь, Удмурт Элькунысь гожъяськисьёслэн огазеяськонысьтызы ёзчиос, Удмурт кун университетысь дышетӥсьёс, Россиысь тодосъя академилэн Урал ёзэтысьтыз История, кылъя но литературая удмурт институтын ужасьёс, «Удмуртия» книгапоттониысь ӧнерчиос, «Удмурт дунне», «Ӟечбур!», «Кенеш», «Инвожо», «Вордскем кыл» газетъёсысь но журналъёсысь ужасьёс.

 

Возьмаськомы вань мылкыд карисьёсты.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru