Версия для слабовидящих

1–5-тӥ классъёслы «Ӟеч-а, бур-а, удмурт кыл!» учебно-методической комплекслэн презентациез

1–5-тӥ классъёслы «Ӟеч-а, бур-а, удмурт кыл!» учебно-методической комплекслэн презентациез

28-тӥ южтолэзе 16 часын Удмурт Элькунысь Йӧскалык библиотекаысь шаертодонъя но финн-угор литературая ёзэтаз (Удмуртская урам, 264-тӥ юрт) «Удмурт шаер» клублэн заседаниез ортчем улсын 1–5-тӥ классын дышетскисьёс понна дасям «Ӟеч-а, бур-а, удмурт кыл!» УМК-лэн презентациез ортчоз.

Учебникъёслэн авторъёссы – Удмурт Элькунысь Дышетон удысын йӧскалык ужпумъёсты тодон-эскеронъя институтын ужасьёс Н. П. Боталова, Б. Е. Боталов, Н. А. Главатских, Е. В. Перевозчикова, Е. В. Фазлеева.

 

УМК-е дышетскон книгаос, тетрадьёс, дышетӥсьёслы юрттэтъёс пыро. Солэн валтӥсь тодметэз росси образованиын азьвыл ик кутӥськись тужгес но умой ӧръёсты туала дышетон технологиосын, методикаысь выльдӥськонъёсын огазеян луэ. 1–4-тӥ классъёслы дасям «Ӟеч-а, бур-а, удмурт кыл» сузьетъёс 2003–2007-тӥ аръёсы потӥзы но уже кутӥськылӥзы ни элькун школаосамы.

 

Вылез – дышетскон книга но ужан тетрадь 5-тӥ класслы 2012 арын шуркынмон толэзе потӥзы. Ӟуч пиналъёсты удмурт кыллы дышетон пыкъяське анай кыл вылэ (книгалэн пумаз сётӥське удмурт кылъя ӟуч кылын вакчияк грамматической справка). Дышетскон материал блокъёслы люкемын (семья, школа, шутэтскон, инкуазь но мукет), сое дышетонын кутӥське пӧртэм амал (кылзон, лыдӟон, кузэн ужан но мукет). Дышетскон книгае пыро трос пӧртэм суредъёс, кудъёсыз этнокультура валатонъёсты сёто, лыдӟон текстъёс карыса тодмо удмурт кылбурчиослэн кылбуръёссы (Г. Ходыревлэн, В. Возняковлэн, Д. Майоровлэн, В. Кирилловлэн), прозаысь капчиятэм люкетъёс (Т. Архипов, И. Гаврилов) но шаертодонъя энциклопеди изданиосысь люкетъёс кутэмын.

 

Та дышетон пособиосты дасян азьлантӥське – «Ӟеч-а, бур-а, удмурт кыл!» 9-тӥ классозь лэсьтэмын луоз.

 

Презентациын «Удмурт кыл школаын» адӟытон ужалоз. Выль «Ӟеч-а, бур-а, удмурт кыл!» сузьет сяна, мукетъёсыз пырозы, кудъёсыз поттэмын вал «Удмуртия» книгапоттониын 1993–2012-тӥ аръёсы но дасямын пӧртэм аудиторилы (удмурт кылын вераськисьёслы – авторез Ю. Т. Байтерякова; удмурт кылын ляб но воксё вераськисьтэмъёслы – авторез Н. П. Боталова); «Вордскем кыл» журналын потэм урокъёслы методической разработкаос но планъёс; XX даурлэн 30–40-тӥ аръёсаз поттэм юрттэт изданиос (А. А. Поздеевлэн «Удмуртский язык для неудмуртов», М. А. Ляминлэн «Удмуртский язык для неудмуртов (для кружков)» но мукет).

 

Ужрадэ шаерысьтымы Лулчеберетъя, печатья но ивортодэтъя но Йӧскалык политикая министерствоосысь ӧнерчиос, Вань удмуртъёслэн «Удмурт кенеш» огазеяськонысьтызы, Удмурт Элькунысь Гожъяськисьёслэн огазеяськонысьтызы ёзчиос, Удмурт кун университетысь дышетӥсьёс, Россиысь тодосъя академилэн Урал ёзэтысьтыз История, кылъя но литературая удмурт институтын ужасьёс, «Удмуртия» книгапоттониысь ӧнерчиос, «Удмурт дунне», «Ӟечбур!», «Кенеш», «Инвожо», «Вордскем кыл» газетъёсысь но журналъёсысь ужасьёс пыриськозы.

 

Возьмаськомы вань мылкыд карисьёсты.

 

 

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru