Версия для слабовидящих

«Большое чтение – 2014» лыдӟиськонни проектъёслэн вожвылъяськон йылпумъянъёсссы

«Большое чтение – 2014» лыдӟиськонни проектъёслэн вожвылъяськон йылпумъянъёсссы

17-тӥ шуркынмонэ, Удмурт Элькунысь муниципал лыдӟиськонниослэн директоръёссылэн совещаниязы котькуд ар ортчись «Большое чтение» нимо библиотека удысысь ӵектосъёсъя элькун вожвылъяськонлэн йылпумъянъёсыз ялэмын вал, кудӥз Росси Федерациын ялэм Лулчеберетлэн арез улсын но М. Ю. Лермонотовлэн 200 арес тырмонэзлы тупатыса ортчытӥськиз.

Вожвылъяськонэ элькунлэн 16 каръёсысьтыз но ёросъёсысьтыз 49 вазиськон вуиз. Тужгес но трос вазиськонъёс Алнаш ёросысь (7 вазиськон), Вотка но Яр ёросъёсысь (быдэн 6 вазиськон) лыдӟиськонниосысь келязы. Витез пӧлысь тужгес но паськыт «Семейные традиции в чтении М. Ю. Лермонтова», «Буктрейлер» но «Лермонтов нон-стоп» номинациос кутӥськизы.

Вожвылъяськонлэн быръёнъёсызлэн критериосыз вылэ пыкъяськыса, эскерись ӧриен учкем ӵектосъёс пӧлысь 13 тужгес но умоез быръемын вал.

 

Быдэстон понна секыт луиз «Лермонтовская энциклопедия» номинаци – М. Ю. Лермонтовлэсь биографизэ но творческой кылёсбурзэ вӧлмытӥсь графикаез, видеоез, куараез, анимациез, текстэз уже кутыса мультимедиа продукт дасяны. Та номинацие одӥг гинэ вазиськон сётэмын вал – Ижевскысь Н. А. Некрасов нимо шор муниципал лыдӟиськоннилэн «Вечный странник М. Ю. Лермонтов: интерактивная карта по жизни и творчеству поэта» ӵектосэз. Тужгес выль информационной технологиосты кутэменыз (онлайн-режимын интерактивной картаосты кылдытонъя дунтэк программаосты) та ӵектос номинацилэн вормисез луиз.

 

Мукет номинациосын эскерись ӧри вормись чотын куинь тужгес тунсыко ӵектосъёсты бырйиз.

«Литературная экскурсия» номинациын тужгес умоез луиз Вотка карысь Перевозинской гурт лыдӟиськоннилэн «Лермонтов онл@йн» ӵектосэз. М. Ю. Лермонтовлэн улон сюресэныз но произведениосыныз герӟаськем синпелет интыостӥ фото- но видеоэкскурсия амалэн библиотечной медиаурокъёсъя серизэс кылдытон – солэн валтӥсь ужпумез луэ. Та номинациын кыкетӥ инты Ижевскысь Н. А. Некрасов нимо шор муниципал лыдӟиськонни басьтӥз – солэн «Маскарад на новый лад» ӵектосэз кылдытэмын но быдэстэмын вал быдэс Россиын ортчись «Библионочь» акцилэн ортчемез улсын. Лыдӟиськонни огъето ужрадъёс ортчытӥз, кудъёсыз акцие пыриськисьёсты М. Ю. Лермонтовлэн улонэныз но творчествоеныз тодмато. Куинетӥ инты басьтӥз Вотка ёросысь Шор лыдӟиськоннилэн «Дорога жизни и творчества М. Ю. Лермонтова» ӵектосэз, кудӥз озьы ик кылбурчи сярысь видеоэкскурсия дасяз.

 

«Буктрейлер» номинациын вожвылъяськонэ пыриськисьёлы дэмламын вал кылдытыны вакчияк видеоролик, кудӥз эркын кабен М. Ю. Лермонтовлэсь творчествозэ рекламировать каре. Вожвылъяськонэ даслэсь уно буктрейлеръёс ыстэмын вал, нош со, милям малпаммыя, вера со сярысь, элькунысь лыдӟиськонниос ужазы егит аудитори куспын книгаез вӧлмытон понна выль кабъёсты чырмыт куто шуыса. Тужгес умоез буктрейлер лыдъямын Вотка ёросысь Шор лыдӟиськоннилэн «Творчество Лермонтова без границ» ужез, кудаз библиотекалэн лыдӟисьёсыз Лермонтовлэсь удмурт кылэ берыктэм произведениоссэ рекламировать каро. Кыкетӥ инты сюриз Шаркан ёрос лыдӟиськонниен кылдытэм – «Песня про царя Ивана Васильевича...» буктрейлерлы. Сое кылдытон борды чырмыт пыриськизы Шаркан шор ёзо школаын дышетскисьёс, соин ролик аспӧртэмлыко пӧрмиз. Куинетӥ инты басьтӥз Играысь К. Митрей нимо шор ёрос лыдӟиськонни: «Я видел раз ее в веселом вихре танца...» буктрейлер, учкисьёсты лермонтовской балэ ӧтьыса, со вакытэ ик тодматэ кылбурчилэн произведениосыныз, кудъёсызлэн пуштросаз балъёс бадӟым инты басьто.

 

Тужгес но трос «Лермонтов нон-стоп» номинацие вазиськонъёс сётэмын вал (лыдӟиськонниослы дэмламын вал М. Ю. Лермонтовлэн 200-арес тырмонэзлы сӥзем быдэс ар ӵоже кыстӥськись ужрад-сузьетъёс малпаны). Тужгес тунсыко ӵектосъёсты Каракулино ёросысь Шор лыдӟиськонни дэмлаз («Лермонтов и поэзия нового времени»), Алнаш ёросысь Шор ёрос лыдӟиськонни («Радиопроект "Поколение next". Читаем поэзию М. Лермонтова») но Якшур-Бодья ёросысь Ивортодэтъя но лулчеберетъя центр (Информационно-культурной центр) («Герой нашего времени» ӵектос).

 

«Семейные традиции в чтении Лермонтова» номинациын пусъемын вал Ижевскысь Л. Н. Толстой нимо огъям библиотека сӧзнэтлэн билиотека-филиалэзлэн «Читаем Лермонтова всей семьей» ӵектосэз, Яр ёросысь Никольской сельской лыдӟиськоннилэн «Возьмите книгу в круг семьи» но Шаркан ёросысь Карсашур филиаллэн «Герой своего времени» ӵектосъёссы.

 

Вань вормисьёслы таукарон гожтэтъёс кузьмазы.

 

 

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru