Версия для слабовидящих

Клуб сярысь

«Удмурт шаер» клуб ужа Удмурт Республикаысь Йӧскалык библиотекалэн шаертодонъя но финн-угор литературая ёзэтэз бордын. Клуб азьын сылӥсь одигез валтӥсь ужпум – удмурт калыклэн историезъя но культураезъя материалъёсты паськыт вӧлмытон.

folk«Удмурт шаер» клублэн нырысетӥ заседаниез ортчиз 1984-тӥ арын 26-тӥ толшоре. Со сӥземын вал поэтлэн но удмурт калык понна нюръяськисьлэн М. Прокопьевлэн вордскемез дырысен 100 ар тырмонлы. Клублэн 30 ар ужамез ӵоже ортчытэмын вал сюлэсь уно заседание, кудаз 8000 пала адями вуылӥз, соос пӧлын Финляндиысь, Венгриысь, Эстониысь тодосчиос, Кировысь шаерчиос.

 

Клуб котьку но пусъе тодмо удмуртъёслэсь юбилейёссэс. Тужгес но кельшо клублэн ёзмуртъёсызлы тодмо адямиосын пумиськонъёс. Трос калык люкало удмурт гожъяськисьёслэн но культура удысын ужасьёслэн презентациоссы.

 

Клублэн куд-ог ужрадъёсыз калыккуспо луо, кылсярысь, Сорбоннаысь профессорен Жан-Люк Мороен пумиськон, Будапештысь университетлэн финн-угор кылъёсъя кафедраысьтыз Энико Сий доцентлэн книгаезлэн презентациез, карел-финн «Калевала» эпослэн но тодмо эстон писательлэн Арво Валтонлэн книгаезлэн удмурт кылэ берыктэмъёссылэн презентациоссы.

Библиотекалэн палэназ пото научно-практической конференциос, кудъёссэ нуо тодосчиос – клублэн ёзмуртъёсыз. Озьы «Кузебай Герд и современность», «М. Коновалов и современность», «Ашальчи Оки и женская поэзия XX века», «Г. Е. Верещагин и этнокультурное развитие Урало-Поволжья», «Талант и тоталитарный режим. М. Петров: жизнь, судьба, творчество» конференциосы быдэс республикаысь адямиос пыриськизы. Клублэн котькуд заседаниезлы книгаослэн авторъёссылы, юбиляръёслы сӥзем адӟытонъёс дасясько. «Удмурт шаерлэн» ужез сярысь ӵемысь газетчиос гожъяло, радио но телевидение пыр верало. Йӧскалык библиотекалэн фондъёсаз клублэн ужамез сярысь верась видео- но аудиогожъямъёс, туспуктэмъёс кылё.

 

minВань ужрадъёсты туж ӟеч ортчытыны юрттэ клублэн История, кылъя но литературая институт, Удмурт кун университет, Удмурт Республикаысь писательёслэн союззы, «Удмурт кенеш» но мукет та выллем огазеяськонъёсын юн кусып воземез.

 

Пусъёно В. Котков поэтлэсь «Удмурт дунне» газетын печатлам кылъёссэ: «Клублэн заседанияз мон висьыса вуи. Ӝыт пумозь паймыса валай, воксё эмъяськи шуыса. Кыӵе ӟеч кужым монэ йӧнатӥз? Валай, со кужым – клубын пумитам тодмоос, эшъёс но библиотекаысь ужасьёс, кудъёсыз туж быгатыса милемлы югыт, капчи мылкыд кылдытӥзы. Кыӵе мыло-кыдо тыршо соос удмурт культураез утён но азинтон уж бордын. Котькудӥз библиотекарь сярысь нимысь верос гожтыны луоно. Соин ик мон ваньдылы дэмласько, клубе лыктыса, ваньзэ ас синмыныды адӟыны».