Версия для слабовидящих

Библиотекалэн историез

2013 арын 15 куартолэзе Удмурт Элькунысь йӧскалык лыдӟиськоннилы 95 арес тырмиз. Библиотекалэн историез быдэс Росси шаерлэн, Удмурт шаерлэн но шоркармылэн историеныз юн герӟаськемын.

 

old libraryКАР НО УЛОСВЫЛ ШОР БИБЛИОТЕКА. Ижкар XX даурлэн кутсконаз кар ним уг нуллы вал ай, озьы ке но со кунамы тужгес бадӟым военно-промышленной центр вал. Ижевский завод посёлокын улӥсьёслэн лыдзы губернской Вятка карлэсь бадӟымгес вал – 42 сюрс пала адямиос улӥзы. Ижкарез кар шуыса нимамзы бере (1918 ар, толшор) калыкез дышетонъя кар кенешлэн исполкомез Шор кар лыдӟиськонни кылдытон сярысь малпанзэ вераз. 1918 арын 24 тулыспалэ быръемын вал лыдӟиськонни кенеш, кудӥзлы библиотекаез радъян борды кутскыны косӥзы.

М. Ф. ШитовРадъясез но нырысетӥ директорез Ижкарысь Михаил Федорович Шитов (1889–1934) луиз, азьланяз бадӟым промышленной предприятиослэн кивалтӥсьсы. Кутскон луиз Ижкарысь бадӟым лыдӟиськонниосысь люкам 20 сюрс книга но газет-журнал экземпляръёсын фонд. Библиотека 15 куартолэзе 1918 арын усьтӥськиз. Пыд йылаз султон дырыз Граждан ож вакытъёслы тупаз. Ожмаськон вакытэ лыдӟиськоннилэн фондэз шӧдскымон куашказ – быдэсак шуымон быризы чеберлыко но справочной литератураен ёзэтъёс. Карын совет кивалтэт ужаны кутскем бере, лыдӟиськонние выль книгаос вуизы но выльысь 1919 арын 1 инвожое усьтӥськиз.

Вотской автономной улосвыл кылдэмен (шуркынмон, 1920 ар) библиотека улосвыл ним басьтӥз. Солэн фондэз 25 сюрс книга но газет-журнал экземпляр вал, лыдӟисьёсыз 3 сюрс пала луизы, нуналэзлы библиотекае 120 пала адями вуылӥз. 1923 арын Ижкарын Лыдӟиськонниослэн огазеяськонзы ужаны кутскиз, кудӥз улосвылысь библиоткаослэсь ужамзэс умойгес карон бордын выриз. Огазеяськонэз кылдытӥсь но солэн председателез вал Сергей Алексеевич Пацианский, Быдэс Россиысь библиотекаосын ужасьёслэн 1-тӥ съездаз пыриськись (пӧсьтолэзь, 1924 ар).

 

02ЭЛЬКУН СТАТУСЫН. Кема дыр ӵоже библиотекаын ужасьёслэн лыдзы  6–8 адями пала вал. Нырысетӥ ужасьёслэн нимысьтыз дышетскемзы но лыдӟиськонниосын ужамзы ӧй вал. Трос уж луэмен ӧтьылӥзы лыдӟиськисьёсты юрттылыны. 1934 арын, Удмурт автоном улосвылэз Удмурт АССР карыса нимамзы бере, библиотека элькун статус басьтӥз, ужасьёслэн лыдзы будӥз но ож кутскон азььын 14 адями луиз. Библиотека элькунысь мукет библиотекаослы методической центр луиз, библиограф ужаны кутскиз, лыдӟиськисьёсын абонементын но лыдӟон залын ужазы.
03Кылдэм бераз нырысь аръёссэ библиотека ӵемысь вошъяз интызэ. 1920 арын куартолэзе со интыяськемын вал Н. И. Березинлэн корказ, азьвыл ожтӥрлык фабриклэн но чугун ӵыжатон заводлэн кузёезлэн корказ, 30-тӥ аръёслэн кутсконаз – Советской ульчаысь 32 юртын. 1935 арын гудырикошконэ библиотека Коммунальная ураме (али М. Горького) 78-тӥ юртэ выжиз, кытын 20 арлэсь трос вал – 1958 арозь. Библиотекаын лэсьтэмын вал куноослы нимысьтыз пырон, гардероб, канцеляриослы, интысь интые нуллон фондлы, абонементлы но лыдӟиськон заллы нимысьтыз бӧлет висъямын вал. 1930-тӥ аръёсы лыдӟиськонлэн фондэз тросслы йылӥз но 54,8 сюрс экземпляр луиз. Соин ӵош 1930-тӥ аръёслэн кыкетӥ ӝыныяз библиотечной фондэз чылкытатыны кутскизы. 1937 арлэн пумаз Элькун библиотекаын кылдытэмын вал калык кие сётыны лэзёнтэм спецфонд.

 

БЫДЗЫМ ОЖ ВАКЫТЭ.  Быдӟым ож библиотекалэн ужаназ шӧдскымон воштӥськонъёс ваиз. Фондлэсь тужгес умой люкетсэ сётӥзы госпитальёсын, воинской частьёсын, призывной пунктъёсын интыысь интые ветлӥсь библиотекаосты радъянлы. Отчы туж пӧртэм книгаос пыризы ­– художественной литература но, пӧртэм ӧнеръёсъя книгаос но. Умой дышетскем ужасьёс ӧз тырмылэ (ӝыныез Ижкарысь заводъёсы мобилизовать каремын вал), туж ӵем кошкылӥзы ужасьёс ­– 1941–1945 аръёс куспын гинэ 61 адями воштӥськиз. 04Быдэс ож дырез лыдӟиськонниын вить адями ужаз: директор Зоя Александровна Долганова (Быдӟым Атыкай ож дыръя ужамез понна «За трудовое отличие» медаль сётӥзы), валтӥсь библиотекарь, бӧрысьгес абонентэн кивалтӥсь, библиограф Е. Н. Зыкова («За доблестный труд в Великой Отечественной войне 1941–1945 гг.» медален пусъемын), В. Н. Архипова (УАССР-ысь Совнаркомлэн Наркомпрослэн Почетной грамотаосыныз пусъемын), библиотекарь, берлогес директорлэн воштӥсез, методист Н. В. Щуклина, лыдӟиськон залэн кивалтӥсь С. А. Трефилова но юрттэт ужъёсты быдэсъясь Ф. С. Зайцева.

 

05

ОЖ БЕРЕ ДАС АРЪЁС. 1945–1957 аръёс библиотекалэн ужезлэн ӧре пырон дырыз луиз, материально-техничекой базазэ юнматон вакыт. Ож бере нырысетӥ дас ар куспын лыдӟиськоннилэн фондэз 84 сюрс экземплярысен (1947 ар) 220 сюрсозь (1957 ар) йылӥз. 1950-тӥ аръёсы ужасьёслэн профессиональной быгатонлыкъёссы будӥз.

1946 арын кунгожсьӧр литератураен сектор висъямын вал, кудӥныз кивалтӥз Варшаваысь университетэз (1904) но Ижкарысь марксизм-ленинизм ӝыт университетлэсь философи факультетсэ (1946) йылпумъям Иван Дмитриевич Иванов, Со тоэ вал англи, немец, француз но поляк кылъёсты. Сектор ужаз лыдӟисьёсын, кунгожсьӧр кылъёсын книгаослы библиографической обработка лэсьтӥз, озьы ик кунгожсьӧр кылъёсты дышетонъя кружокъёс нуиз. 1950 арын коньывуонэ сектор быдтэмын вал но выльысь устӥськиз 1961 арын толсуре.  1951–1955 аръёсы библиограф луыса, 1955–1957 методической ёзэтлэн кивалтӥсез луыса ужаз Москваысь кун библиотечной институтэз йылпумъям Санчес-Хосе Фернандес. 1937 арын со мукет испан пиналъёсын ӵош ваемын вал Москвае пиналъёслы юртэ, кытын 1941 арозь улӥз. 1944 арын аслаз мылкыд каремезъя армие кошкиз.

1952–1961 аръёсы лыдӟиськоннилэн директорез вал Апполинария Семеновна Жукова (кык «Знак Почета» орденэн пусъемын но «За доблестный труд в Великой Отечественной войне 1941–1945 гг.» медален).

061950-тӥ аръёсы фондлэн но лыдӟисьёслэн будэменыз сэрен выль юртъер пуктоно луиз. Проект Ставропольысь улосвыл библиотека вылэ пыкъяськыса лэсьтэмын вал (архитекторъёсыз А. Э. Лопатто но А. Г. Лысяков), кудзэ 1955 арын пуктӥзы. Ижкарысь библиотек проектлэн авторъёсыз, кудӥз 500 сюрс экземпляр книгалы шуыса лэсьтэмын вал (1958 арын 1 толсурлы библиотекалэн книга фондэз 220 сюрс экземпляр вал), В. И. Антощук но Б. С. Чичкин луизы. Лыдӟиськисьёслы библиотека 1958 арын 17 тулыспалэ усьтӥськиз, отысен солэн азинскон историезлэн выль даурез кутскиз.

 

new libraryТОДОСЛЫКО НИМЫН. Кызь ар ӵоже (1937–1957) лыдӟиськонни А. С. Пушкинлэсь нимзэ нуллӥз; 1957 арысен 1989 арозь В. И. Ленинлэсь нимзэ, туннэ нуналозь но со тросэз лыдӟисьёслы «ленинка» нимын тодмо.
1963 арын библиотекалы тодослыко статус сётэмын. Татын ортчыны кутскизы Москваысь, Ленинградысь, Волга но Урал которысь каръёсысь ӧнерчиосын научно-практической конференциос, озьы ик элькун смотръёс но ӵошатсконъёс. Библиотека элькунамы вань печатласькем ужъёслы лэсьтыны кулэ вал кун регистрация, озьы со луиз йӧскалык библиография тодос центр. 1960 арысен библиотекаын «Летопись печати Удмуртской Республики» нимо библиографической указатель потэ, ретроспективной но туала библиографиен изданиос дасясько. Библиотекаын выль ёзэтъёс кылдо: газет-журналъёсын (1962), шаертодонъя но йӧскалык литературая (1969), кун библиография ёзэт (1978), редакционно-издательской ёзэт (1978), шер пумиськись книгаосын но нимысьтыз возёно литератураен ёзэт – али шер пумиськись но дуно документъёсын ёзэт. 1984 арын 26 толшоре «Удмурт шаер» клублэн нырысетӥ пумиськонэз ортчиз.

0708sobinakalinina

1961–1976 аръёсы библиотекаен Петр Николаевич Глухов («За доблестный труд в Великой Отечественной войне 1941–1945 гг.» пусъемын)  кивалтӥз, 1976–1987 аръёсы Удмуртиысь но   РСФСР-ысь лулчеберет удысысь сиё-дано ужась Мария Дмитриевна Трефилова; 1988–2003 аръёсы Удмуртиысь но Росси Федерациысь лулчеберет удысысь сиё-дано ужась Наиля Мизхатовна Собина. 2004 арысен туннэ нуналозь Удмурт Элькунысь Йӧскалык библиотекалэн директорез – Галина Гавриловна Калинина.

 

РОССИЫН ЙӦСКАЛЫК НИМЫН НЫРЫСЕТӤЕЗ. 1989 арын библиотекалы йӧскалык статус сётэмын, кудӥзлы луыса солэн ужан ӧрыз трослы воштӥськиз но паськытаз. 1992 арын Росси Федерациын нырысьсэ «Память Удмуртии: формирование и сохранение национального фонда печатных памятников культуры Удмуртской Республики» нимо программа кутэмын вал, кудӥзъя лэсьтӥсько кема кыстӥськись «Национальная книга», «Национальная библиография» но «Фонд редких и ценных документов» проектъёс. Та программа Удмурт Элькунысь лулчеберетъя министерствоын, нош 1998 арын элькунын юнматэмын вал. 1999 арын библиотекаын ужасьёслы «Летопись печати Удмуртской Республики», «Удмуртское языкознание», «Картографические издания об Удмуртии», «Удмуртская песня», «Указатель библиографических работ об Удмуртии», «Мултанское дело», «Кузебай Герд», «Ашальчи Оки» нимо библиографической юрттэтъёс дасямзы понна Удмурт Элькунлэсь лулчеберет но искусство удысысь кун премизэ сётӥзы.

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru